თურქმენეთში პრეზიდენტის, გურბანგული ბერდიმუჰამედოვის გარდაცვალებაზე ცრუ ინფორმაციის გავრცელების გამო რამდენიმე პირი დააკავეს. ადგილობრივი გამოცემა თურქმენეთის ქრონიკების ინფორმაციით, დაჭერები 25 ივლისიდან დაიწყო.

მათივე თქმით, ლებაპის ველაიათში სამი პირი დააკავეს, რომელთაც ჭორების გავრცელებაში ედებათ ბრალად, რამაც ქვეყნის დესტაბილიზაციაში შეიტანა წვლილი. ამასთანავე, კონტრპროპაგანდის მართვა კულტურის სამინისტროს დაევალა.

ბერდიმუჰამედოვის გარდაცვალების შესახებ ინფორმაცია პირველად 20 ივლისს გავრცელდა. მანამ ის, თითქმის 15 დღის განმავლობაში ფართო საზოგადოების წინაშე არ გამოჩენილა. ეს ინფორმაცია უარყვო საქართველოში თურქმენეთის საელჩომ.

გარდაცვალებაზე ინფორმაციის გავრცელების შემდეგ, პრეზიდენტი კამერების წინ 25 ივლისს გამოჩნდა. Altyn Asyr-ის მიერ გავრცელებულ ვიდეოში ბერდიმუჰამედოვი ინფრასტრუქტურულ პროექტებს ათვალიერებდა.