შინაგან საქმეთა სამინისტრომ, ყოფილი თავდაცვის მინისტრის ირაკლი ოქრუაშვილის დაკავების კადრები გაავრცელა, სადაც პოლიტიკურ ლიდერს სახე დაფარული აქვს.

დაკავების დროს შინაგან საქმეთა სამინისტრო ბრალდებულის სახეს ფარავს და მის ვინაობას აბრევიატურით გამოსახავს. თუმცა რიგ შემთხვევებში მიდგომას ცვლის და "მაღალი საჯარო ინტერესის" მოტივით დაუფარავ მასალას ავრცელებს.

ოქრუაშვილის დაკავების ვიდეოს გავრცელებამდე საგანგებო ბრიფინგზე შსს-ს წარმომადგენელმა ირაკლი ოქრუაშვილის დაკავების ფაქტი საჯაროდ გააჟღერა და მისი სახელი და გვარიც წარმოთქვა. ასევე უწყებამ მისი დაკავების საფუძვლიანობის გასამყარებლად ვიდეოკადრები გაავრცელა, სადაც არც ირაკლი ოქრუაშვილს და არც სხვა 4 დაკავებულს სახე დაფარული არ აქვს.

შინაგან საქმეთა სამინისტრომ 20 ივნისის საქმეზე ყოფილი თავდაცვის მინისტრი ირაკლი ოქრუაშვილი და კიდევ 4 პირი დააკავა. დაკავებულებს ბრალად ჯგუფური ძალადობა ედებათ. 20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 17 პირი, მათ შორის პარლამენტის წევრი — ნიკანორ მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში.