საქართველოს სახალხო დამცველი, ნინო ლომჯარია ფეისბუქზე მალხაზ მაჩალიკაშვილის მიერ კარვის გაშლის უფლებაზე პოლიციის უარსა და ნაციონალური მოძრაობის დროს, შსს-ს ყოფილი თანამშრომლის შოთა უტიაშვილის სახლთან გამართულ აქციას გამოეხმაურა.

ნინო ლომჯარია წერს, რომ საქართველოში შეკრებისა და გამოხატვის თავისუფლების მაღალი სტანდარტი არსებობს და მისი შეზღუდვა მკაცრად გამონაკლის შემთხვევებშია დასაშვები. რაც შეეხება საცხოვრებელ სახლთან შეკრებას, კანონით მხოლოდ მოსამართლეების შემთხვევაში იკრძალება.

"თუმცა, მიმაჩნია, რომ საჯარო პირის საცხოვრებელ სახლთან საპროტესტო აქციის გამართვის დროს ასევე უნდა გავითვალისწინოთ, რომ სახლში, რაც ადამიანის პირადი და დაცული სივრცეა, შესაძლოა, იმყოფებოდნენ ბავშვები, ხანდაზმულები, შშმ პირები და ა.შ. რომელთათვისაც აღნიშნული შესაძლებელია გახდეს დიდი სტრესის საფუძველი. მე ვფიქრობ, რომ პატივი უნდა ვცეთ ადამიანის პირად ცხოვრებას და პირადი სივრცის ხელშეუხებლობას და პროტესტის გამოხატვის დროს გავითვალისწინოთ აღნიშნული გარემოებები", — აცხადებს ნინო ლომჯარია.

მისივე განცხადებით, საპროტესტო აქციის დროს კარვების გამოყენება წარმოადგენს საქართველოს მოქალაქეების შეკრებისა და გამოხატვის თავისუფლებით გარანტირებული უფლების ნაწილს და მისი შეზღუდვა სახელმწიფოს მხრიდან უნდა იყოს ისევე დასაბუთებული, როგორ ამ უფლებით სარგებლობის შეზღუდვა.

"არსებულ არასწორ პრაქტიკასთან დაკავშირებით, სახალხო დამცველს საკონსტიტუციო სასამართლოში სარჩელიც აქვს შეტანილი და იმედია, სასამართლო თავის გადაწყვეტილებაში აღნიშნულ საკითთან მიმართებით განმარტებას გააკეთებს", — ამბობს ომბუდსმენი.

ის მოუწოდებს შსს-ს, საპროტესტო აქციების მიმდინარეობისას უზრუნველყოს ადამიანის კონსტიტუციით გარანტირებული უფლებებით სარგებლობა, საზოგადოებრივი წესრიგი და მოქალაქეთა პირადი უსაფრთხოება.

ნაციონალური მოძრაობის დროს შსს-ს ანალიტიკური დეპარტამენტის უფროსის, შოთა უტიაშვილისა და რუსთავი 2-ის ჟურნალისტის, ეკა კვესიტაძის სახლთან უტიაშვილის ფეისბუქსტატუსის გასაპროტესტებლად აქცია იმართება. კვესიტაძისა და უტიაშვილის ცნობით, ეს პირები ხელისუფლების მხარდამჭერები და "კოკა ყანდიაშვილის ტროლები" არიან.

დღეს, 25 ივლისს საქართველოს პარლამენტთან საპროტესტო კარვის გაშლა სცადა მალხაზ მაჩალიკაშვილმა. პოლიციამ მას ამის უფლება არ მისცა და თქვა, რომ მერიას ადგილზე სარეაბილიტაციო სამუშაოები აქვს დაგეგმილი. თბილისის მერიაში ეს ინფორმაცია უარყვეს და განაცხადეს, რომ გამოხატვის თავისუფლებას ვერანაირი "სარეაბილიტაციო სამუშაო" ვერ შეზღუდავს.