თბილისის საქალაქო სასამართლომ დამნაშავედ ცნო დედა, რომელსაც ბრალად ედებოდა 4 წლის შვილის, ნინოს სიკვდილამდე მიყვანა ცემით. ბრალდებული ასევე დამნაშავედ შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობისთვის ოჯახის წევრის მიმართ. საბოლოოდ, ბრალდებულს სასჯელის სახედ და ზომად განესაზღვრა თავისუფლების აღკვეთა 11 წლის ვადით.

"საქმის არსებითი განხილვისას, ბრალდებულმა თავი არ ცნო დამნაშავედ წარდგენილ ბრალდებაში, თუმცა სხდომებზე გამოკვლეული მტკიცებულებებით, მოწმეთა ჩვენებებით და ექსპერტიზის დასკვნებით გონივრულ ეჭვს მიღმა სტანდარტით დადასტურდა ბრალდებულის მიერ ზემოაღნიშნული დანაშაულებების ჩადენა", — ნათქვამია საქალაქო სასამართლოს განცხადებაში.

სასამართლოს ცნობით, 2019 წლის 6 იანვარს ბრალდებულის მიმართ 30 დღის ვადით გამოიცა შემაკავებელი ორდერი, რომლითაც მას აეკრძალა არასრუწლოვან შვილთან 4 წლის ნინოსთან ან მის საცხოვრებელ ადგილთან მიახლოება და მასთან კომუნიკაცია,

"აღნიშნულის მიუხედავად, 2019 წლის 8 იანვრიდან 22 იანვრის ჩათვლით დედა იმყოფებოდა იმ საცხოვრებელ სახლში, სადაც ასევე ცხოვრობდა მსხვერპლი. გარდა ამისა, უტყუარად დადასტურდა ის ფაქტი, რომ ბრალდებული 2019 წლის იანვრის თვის დასაწყისიდან 22 იანვრამდე დროის პერიოდში თავის არასრუწლოვან შვილს სისტემატიურად სცემდა და ახორციელებდა მის მიმართ ფიზიკურ ძალადობას, რის შედეგადაც არასრულწლოვანი განიცდიდა ფიზიკურ ტანჯვას და სხეულის სხვადასხვა მიდამოებში აღენიშნებოდა სხვადასხვა ხანდაზმულობის დაზიანებები, სისხლნაჟღენთების და ნაჭდევების სახით", — ვკითხულობთ განცხადებაში.

ამავე განცხადებაში ვკითხულობთ, რომ 2019 წლის 21 იანვრიდან 22 იანვრამდე ღამის პერიოდში, ბრალდებულმა თავის არასრულწლოვან შვილს თავის არეში მიაყენა სიცოცხლისთვის სახიფათო მძიმე ხარისხის დაზიანება, კერძოდ, ქალა-ტვინის ბლაგვი ტრავმა, რამაც გამოიწვია სისხლჩაქცევა თავის ქალას ღრუში და თავის ტვინის მკვეთრი შეშუპება, ღეროს დისლოკაცია და ჩაჭედვა კეფის დიდ ხვრელში, რაც გახდა არასრულწლოვნის გარდაცვალების მიზეზი.