სამეფო კარის თამაშების გულმხურვალე ფანებს ჯერ კიდევ არ დავიწყებიათ ის იმედგაცრუება, რომელიც ეპიკური სერიალის ფინალურმა სეზონმა დაუტოვათ. მათ ის პეტიციაც ემახსოვრებათ, რომელსაც მერვე სეზონის ხელმეორედ გადაღების მოთხოვნით 2 მილიონამდე ადამიანმა მოაწერა ხელი.

სერიალის ისტორიაში, IMDb-ზე ყველაზე დაბალრეიტინგულად შეფასებული ფინალური ეპიზოდის გასვლიდან ორ თვეზე მეტი გავიდა, HBO-მ კი საბოლოოდ განმარტა, რომ მასშტაბური უკმაყოფილების მიუხედავად, მერვე და საბოლოო სეზონის ალტერნატიული ვერსიის გადაღებას არ აპირებს.

"დევიდ ბენიოფმა და დ.ბ. ვაისმა დაამტკიცეს, რომ არიან არაკომპეტენტური სცენარისტები. მათ არ შეუძლიათ წერა, როცა არ აქვთ საწყისი მასალა (წიგნები), რომელსაც დაეყრდნობიან. ეს ისტორია იმსახურებს ფინალურ სეზონს, რომელსაც აზრი ექნება", — წერდა პეტიციის ავტორი.

ბევერლი-ჰილზში გამართულ პრეს ტურზე, HBO-ს პროგრამების პრეზიდენტმა, კეისი ბლოისმა თქვა, რომ მიუხედავად ხელმომწერთა რაოდენობისა, არხი არც მაშინ და არც ახლა მათ შეთავაზებას არ თანხმდება:

"ასეთი პოპულარული შოუს არსებობას რამდენიმე უარყოფითი მხარეც აქვს. ერთ-ერთი ისაა, რომ მისი დასრულებისას უამრავ ადამიანს აქვს მოსაზრება იმაზე, თუ როგორი უნდა იყოს ის. ეს სიტუაციის ბუნებრივი განვითარებაა. პეტიციამ კიდევ ერთხელ დაამტკიცა, რომ შოუს მიმართ დიდი ენთუზიაზმი არსებობდა, თუმცა ეს იმას არ ნიშნავს, რომ ჩვენ მას სერიოზულად განვიხილავთ. არც ის მგონია, რომ ამას რომელიმე სხვა არხი გააკეთებდა".

ასე რომ, შესაძლოა დეინერის ტარგარიენის ალტერნატიული სახე ვეღარ იხილოთ, თუმცა შეგიძლიათ GOT-ის პრიქველს დაელოდოთ, რომლის გადაღებაც უკვე დაწყებულია.

ამავე თემაზე: