იუსტიციის უმაღლესი საბჭოს წევრმა სერგო მეთოფიშვილმა ომბუდსმენის განცხადებას, მოსამართლეების შესარჩევ კონკურსზე "აბსურდული კვლევა" უწოდა და თქვა, რომ იგი არცხვენს სახალხო დამცველის სტატუსს. ამის შესახებ მეთოფიშვილმა მოსამართლეობის კანდიდატ ლევან თევზაძის გასაუბრებაზე ისაუბრა, რითაც გამოეხმაურა არამოსამართლე წევრის, ნაზი ჯანეზაშვილის კითხვას ომბუდსმენის ანგარიშზე.

ომბუდსმენის განცხადებით, გამოვლინდა 13-დან 10 ბიულეტენი, რომელიც შემოხაზული იყო ერთნაირი სქემით და დამთხვევების ძალიან მაღალი ხარისხით. მეთოფიშვილმა ნაზი ჯანეზაშვილს კითხვითვე მიმართა, იცნობს თუ არა ისეთ კოლეგიალურ ორგანოს, სადაც კონსულტაციები აკრძალულია.

"მე ვადასტურებ, ღიად, არ ვმალავ, რომ მე რამდენიმე ადამიანთან გავიარე კონსულტაციები. აბსურდულად აქვთ კვლევაში მითითებული 10 კაციო და აბსურდული არითმეტიკა აქვთ მოყვანილი. მგონია, რომ ეს თვითონ სახალხო დამცველის გაკეთებული არ არის. ეს, ალბათ, ვიღაც არაკვალიფიციურმა და არაკეთილსინდისიერმა თანამშრომელმა გააკეთა და არც წაუკითხავს ქალბატონ სახალხო დამცველს. მისი ფუნქციაც არ არის და არც უფლებამოსილება, რომ ზედამხედველობა გაუწიოს ან სასამართლოს ან საბჭოს საქმიანობას", — თქვა სერგო მეთოფიშვილმა.

ომბუდსმენი გავრცელებულ განცხადებაში აცხადებს, რომ უზენაესი სასამართლოს მოსამართლეების ასარჩევად იუსტიციის უმაღლეს საბჭოში გამართულ პირველ ფარულ კენჭისყრას ხარვეზები აქვს.