"ზურაბ ადეიშვილთან გვქონდა ურთიერთპატივისცემა, როგორც დაქვემდებარებულს და ხელმძღანელს და მას ჰქონდა ჩემდამი დამოკიდებულება, როგორც კარგი იურისტისა და პროფესიონალისადმი", — ამის შესახებ უზენაესი სასამართლოს მოსამართლეობის კანდიდატმა, საკონსტიტუციო სასამართლოს მოქმედმა თავმჯდომარემ, ზაზა თავაძემ იუტიციის უმაღლეს საბჭოში გასაუბრებაზე განაცხადა. ამ კომენტარით მან საბჭოს არამოსამართლე წევრის, ნაზი ჯანეზაშვილის კითხვას უპასუხა, რომელიც იუსტიციის ყოფილ მინისტრთან და ყოფილ გენერალურ პროკურორთან, ზურაბ ადეიშვილთან მის თანამშრომლობას ეხებოდა.

ჯანეზაშვილმა თქვა, რომ ზაზა თავაძე 2007-2008 წლებში ზურაბ ადეიშვილის გენერალური პროკურორობის დროს მუშაობდა პროკურატურაში, 2008-2010 წლებში კი იუსტიციის მინისტრის მოადგილე იყო.

"2004 წელს დავინიშნე საკადრო უზრუნველყოფის დეპარტამენტის უფროსის მოადგილედ, სადაც ჩემი ექსკლუზიური ვალდებულება იყო, რომ უნდა წარმომედგინა პროკურატურა საერთო სასამართლოებში, ყველა ინსტანციაზე. ეს იყო ჩემი კარიერული წინსვლის მთავარი ქვაკუთხედი. ადეიშვილს არ ვიცნობდი. პირველი ინსტანციაში, როდესაც მოსამართლეებმა ნახეს, როგორი წარმომადგენელი ვიყავი, შემდეგ შეხვედრებზე და ღონისძიებებზე პროკურორთან თქვეს: რა კარგი წარმომადგენელი ჰყავს პროკურატურას. მეორე ინსტანციის სასამართლომაც იგივე თქვა, მესამე ინსტანციის სასამართლომაც", — ამბობს თავაძე.

მისივე თქმით, ამან გამოიწვია ის, რომ ადეიშვილმა მისი პროფესიონალიზმი დაინახა და კადრების უფროსად დანიშნა.

"ამის შემდეგ იყო ის, რომ მე კიდევ უფრო დავწინაურდი და გავხდი იუსტიციის მინისტრის მოადგილე, სადაც ვიმუშავე ორ წერლზე მეტი. 2010 წელს, მე ვფიქრობ, რომ გამიმართლა და აღმოვჩნდი საკონსტიტუციო სასამართლოს მოსამართლე. ეს იყო სულ ჩემი შეხება ადეიშვილთან", — აღნიშნა თავაძემ.