გენერალურმა პროკურორმა და უზენაესი სასამართლოს თავმჯდომარეობის კანდიდატმა, შალვა თადუმაძემ იუსტიციის უმაღლესი საბჭოში გასაუბრებაზე ნაზი ჯანეზაშვილის აცილება მოითხოვა. თადუმაძემ იქვე უარი თქვა აცილების საკითხზე და საბჭოს წევრს თავისი უფლებამოსილების ცოდნისკენ მოუწოდა.

"არ ვიცი აქ პროტესტი უნდა გამოვაცხადო, თუ კითხვის აცილება, ქალბატონო ნაზი, მე გიდასტურებთ ჩემს პატივისცემას, მაგრამ მე მიმაჩნია, რომ თქვენი კითხვა არის საფუძველი, მე თქვენი აცილება დავაყენო. დროის გაწელვაში რომ არ ჩამეთვალოს, ამაზე უარს ვამბობ", — თქვა თადუმაძემ ნაზი ჯანეზაშვილის კითხვაზე, რომელიც შეეხებოდა, თუ რატომ გრძელდება გამოძიება ისეთ საქმეებზე, სადაც ხანდაზმულობის ვადა ამოწურულია. მან ასევე გიორგი მიქაუტაძის სისხლის სამართლის საქმეზეც დასვა შეკითხვა, რაზეც ხანდაზმულობის ვადა გასულია, თუმცა გამოძიება მაინც გრძელდება. ჯანეზიშვილი პროკურორს ჩაეკითხა, თუ რატომ არ დასრულდა ეს საქმე და ხომ არ ნიშნავს ეს მოსამართლეზე ზეწოლას.

გენერალურმა პროკურორმა განმარტა, რომ ნაზი ჯანეზაშვილი არაა უფლებამოსილი არც კონსტიტუციით, არც კანონით, ანგარიში მოისმინოს გენერალურ პროკურატურის საგამოძიებო საქმეებთან დაკავშირებით.

შალვა თადუმაძემ ნაზი ჯანეზაშვილი კანონის დარღვევაში დაადანაშაულა, რადგან მოსამართლე გიორგი მიქაუტაძის საქმეზე დასმული კითხვა თადუმაძემ ანგარიშის მოთხოვნად მიიჩნია:

"ამის უფლება თქვენ არ გაგაჩნიათ. როდესაც წევრი კანონს არღვევს, მაშინ მისი აცილების საფუძველი არსებობს... შეფარვითი კითხვა, რომ გამოძიების არდამთავრება ხომ არ ნიშნავს მოსამართლეზე ზეწოლას, ეს შეურაცხმყოფელია ჩემთვის. მე არ ვარ გენერალური პროკურორი, რომელიც საქმეებით ვიღაცაზე ზეწოლას ვახდენ. მე სრული საფუძველი მაქვს თქვენი აცილების საკითხი დავაყენო, მაგრამ არ დავაყენებ. კი ბატონო, გავაგრძელოთ, მაგრამ მოგიწოდებთ, კითხვები დასვით ის, რისი უფლებამოსილებაც თქვენ გაგაჩნიათ".

შალვა თადუმაძე უკვე ერთი წელია, რაც გენერალური პროკურორია. მანამდე, ექვსი წლის განმავლობაში, მთავრობის ადმინისტრაციის საპარლამენტო მდივანი იყო. თადუმაძე ეწეოდა საადვოაკტო საქმიანობას. ის ბიძინა ივანიშვილის პირადი იურისტი იყო.