ამერიკის შეერთებული შტატების სახელმწიფო დეპარტამენტი აცხადებს, რომ საქართველოს მთავრობამ სამართლიან და აპოლიტიკურ გარემოში უნდა აღასრულოს სტრასბურგის სასმართლოს განაჩენი რუსთავი 2-თან დაკავშირებით. ინფორმაციას ამერიკის ხმა ავრცელებს.

"გამოხატვის თავისუფლება და მედია ლანდშაფტი, რომელიც აზრთა ფართო სპექტრს წარმოადგენს, არის დემოკრატიის საფუძველი. ჩვენ მოვუწოდებთ [საქართველოს] მთავრობას, რომ აღასრულოს ადამიანის უფლებათა ევროპული სასმართლოს გადაწყვეტილება ისე, რომ ეს იყოს სამართლიანი, აპოლიტიკური და მისცეს საშუალება მედიას, რომ წარმოადგინოს სხვადასხვა შეხედულება და აზრი", — განაცხადა სახელმწიფო დეპარტამენტის პრესსპიკერმა ამერიკის ხმის ჟურნალისტის პასუხად.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. ახლა რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა.