კინოსტუდია Universal-მა ბროდვეის ისტორიაში ერთ-ერთი ყველაზე მოთხოვნადი და პოპულარული დადგმა Cats ფილმად გადაიღო. მიუზიკლში მთავარ როლებს ჯეიმს კორდენი, ჯუდი დენჩი, იან მაკკელენი, ჯენიფერ ჰადსონი, იდრის ელბა, ტეილორ სვიფტი და ფრანჩესკა ჰეივორდი ასრულებენ.

ფილმი Les Misérables-ის რეჟისორმა, ტომ ჰუპერმა გადაიღო. ლეგენდარული მიუზიკლის, კატების ეკრანიზაციაში ბეწვი ციფრულადაა შექმნილი. პირველ ტრეილერში გრიზაბელას როლის შემსრულებელი ჯენიფერ ჰადსონი მიუზიკლიდან ვებერის ცნობილ კომპოზიციას, Memory-ის ასრულებს, მის ფონზე კი მოცეკვავე კატებს ვხედავთ.

ენდრიუ ლოიდ ვებერის ლეგენდარული დადგმა ტომას ელიოტის 1939 წლის საბავშვო წიგნზეა დაფუძნებული. მიუზიკლში მეჯლისის ღამეა აღწერილი, როდესაც კატები ერთად მოიყრიან თავს. მათ უნდა გადაწყვიტონ და აირჩიონ ის ერთადერთი, რომელიც კატების სამოთხეში გაეშურება და დედამიწაზე რეინკარნაციით დაბრუნდება. ფილმიც სწორედ ამ დადგმაზეა დაფუძნებული.

კატების პრემიერა 20 დეკემბერს შედგება.

ფოტო: Universal Pictures