გადაცემაში შეხვედრები რეგიონულ მედიასთან ბიძინა ივანიშვილი აცხადებს, რომ ენმ-ს მმართველობის პერიოდში საზოგადოებამ ე.წ. წამების კადრების გამოქვეყნებამდეც კარგად იცოდა, თუ როგორ აწამებდნენ პატიმრებს ციხეებში. მან ასევე აღნიშნა, რომ ენმ-ს მმართველობის პერიოდში პირადი ცხოვრების ამსახველ კადრებზე 100 მილიონ ლარზე მეტი დაიხარჯა:

"იჭერდნენ, აწამებდნენ იმიტომ, რომ გაეგოთ, რომ იქ რომ შეხვალ საფრთხე გემუქრება და ვეღარ გამოხვალ და ამით ცდილობდნენ საზოგადოების დათრგუნვას. ეს იყო ტოტალური მეთოდი. ჯერ გამოვიდნენ და განმარტებები გააკეთონ. რაზე იტყვიან უარს, რომ აღარ დახოცავენ ახალგაზრდებს, აღარ გააუპატიურებენ, აღარ შეუვარდებიან ოჯახებში, აღარ დააწერინებენ ღამე ჩუქების ნოტარიულად გაფორმების ქაღალდებს, აღარ ჩაერევიან სხვის პირად ცხოვრებაში, აღარ გადაიღებენ ამდენ კადრებს? 100 მილიონზე მეტი მოვითვალეთ მარტო პირად კადრებზე რაც დაიხარჯა. ვითომ შუაშისტები, ფსევდო ობიექტურები კი ამბობენ, რომ ისინიც ცუდები იყვნენ, ესენიც ცუდები არიანო".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.