საპატრიარქოს განცხადებით, აფხაზეთისა და ე.წ. სამხრეთ ოსეთის შესახებ რუსეთის პრეზიდენტის, ვლადიმერ პუტინის განცხადება საქართველოს სახელმწიფოს, ქართველი მეცნიერებისა და ყველა ადამიანისთვის გამოწვევად უნდა იქცეს. საუბარია პუტინის განცხადებაზე, რომელმაც თქვა, რომ საქართველომ "აფხაზეთის ოკუპაცია მოახდინა" და "ოსეთში გენოციდი დაიწყო".

საპატრიარქო მიიჩნევს, რომ ისტორიული ფაქტების ამგვარი დამახინჯება არსებული კონფლიქტების გაღრმავებას უწყობს ხელს.

"[უნდა] განხორციელდეს სწრაფი რეაგირება, რათა, როგორც ჩვენი ქვეყნის ზოგადი ისტორიის, ისე მისი ცალკეული ეტაპების შესახებ არსებული სამეცნიერო გამოკვლევები და პოპულარული ენით დაწერილი მასალაც მსოფლიოში გასავრცელებლად კვალიფიციურად შეირჩეს და დროულად ითარგმნოს ინგლისურ, რუსულ და სხვა უცხო ენებზე", — აღნიშნულია საპატრიარქოს განცხადებაში.

მათივე თქმით, საპატრიარქო მზად არის, ისტორიულ რეალობებზე მსჯელობისათვის კონფერენციებისა და შეხვედრების მოწყობაში ყველა მხარეს შეუწყოს ხელი.

ოკუპანტი ქვეყნის პრეზიდენტი, ვლადიმერ პუტინი ამტკიცებს, რომ ოკუპანტი არა თავად, არამედ საქართველოა. ის ოკუპაციის საკუთარ ვერსიას ავრცელებს და ირწმუნება, რომ 1918 წელს საქართველომ გერმანიის დახმარებით აფხაზეთის ოკუპაცია მოახდინა. ის კიდევ უფრო შორსაც წავიდა და ოსების გენოციდში საქართველო დაადანაშაულა.