შინაგან საქმეთა მინისტრს, გიორგი გახარიას მიაჩნია, რომ ბოკერია-ხოშტარიას და ვასაძე-ფალავანდიშვილის ჯგუფებს შორის განსხვავება არაა. ამის შესახებ მან გადაცემა რეაქციაში განაცხადა და 8 ივლისს ერთდროულად ჩატარებულ აქციებზე ისაუბრა.

"ერთ მხარეს გვყავდნენ ბატონი ბოკერია, ქალბატონი ხოშტარია და მეორე მხარეს გვყავდნენ ვასაძე და ფალავანდიშვილი — აბსოლუტურად რადიკალური, ერთმანეთისგან არაფრით განსხვავებული ჯგუფები, თავისი რადიკალიზმით. როდესაც პუშკინის სკვერში იკრიბება, შეიძლება სამართლიანი პროტესტისთვის და პოლიცია სთხოვს, რომ იქ არის აგრესიულად განწყობილი ჯგუფი და იქნებ სხვაგან გამოთქვათ, თქვენი გამოხატვის თავისუფლება არ იზღუდებაო და როდესაც ეს ხალხი, ვითომ ინტელექტუალური ოპოზიცია ამოფარებული ახალგაზრდებს და მათ ემოციებს, იძახის, რომ ჩვენ ამათ ვერ ვაკონტროლებთ და აუცილებლად, მარში და მსვლელობა უნდა ჩავატაროთო, შუბლი შუბლით და შევქმნათ ქვეყანაში დაპირისპირების და ემოციების კიდევ ერთი კერაო, რა დავარქვათ ამას?! ეს არის რადიკალური ოპოზიცია, გაურკვეველი ამბიციებით. ჩემთვის არანაირი სხვაობა არაა და არც ერთი პოლიციელისთვის მათ შორის სხვაობა არ არი".

8 ივლისს რუსთაველის გამზირზე ერთდროულად ორი აქცია მიმდინარეობდა. აქცია #სირცხვილიას მონაწილეებს ჰომოფობიურად განწყობილმა ჯგუფებმა პარლამენტის წინ დადგომის საშუალება არ მისცეს და არც აპარატურა ააწყობინეს. საათების განმავლობაში ორ აქციას პოლიციის კორდონი და ყვითელი ავტობუსები ჰყოფდა.

აქციის მონაწილეებმა მთელი ღამე რუსთაველის გამზირზე გაათენეს. რამდენჯერმე მოხდა მცირე დაპირისპირება. გამთეენისას ჩაკეტილი რუსთაველის გამზირი გაიხსნა. აქცია #სირცხვილიას მონაწილეებმა პარლამენტთან ტერიტორია დაიკავეს.

ამავე დღეს, ჰომოფობიური ჯგუფების მოთხოვნის მიუხედავად თბილისი პრაიდმა ღირსების მარში მოაწყო.