საპატრიარქოს საზოგადოებასთან ურთიერთობის სამსახურის ხელმძღვანელი, ანდრია ჯაღმაიძე მიიჩნევს, რომ წამყვან გიორგი გაბუნიას მიერ ვლადიმერ პუტინის გინება რუსთავი 2-ის დასასრულის დასასრულია. მისივე თქმით, დასასრულის დასაწყისი მაშინ დაიწყო, როცა ტელევიზიამ "ეკლესიის ღია დისკრედიტაცია დაიწყო". ამის შესახებ ჯაღმაიძე Facebook-ზე წერს.

მისი თქმით, საზოგადოებაში ამ გადაცემის გამო გამოწვეული მისივე თქმით, ნეგატიური დამოკიდებულება შეუძლებელია რაიმე რუსულ ნარატივს მიაწეროს ვინმემ. ჯაღმაიძის თქმით, ამ მცირე სიუჟეტში ტელეკომპანიამ "ქართული კულტურისა და ეთიკისათვის სრულიად მიუღებელი სულმდაბლობის გამოვლინება მოახერხა, მკრეხელობაზე მეტი რომ აღარაფერი ვთქვათ".

"დაახლოვებით ერთი წლის წინ რუსთავი2 -ს საპატრიარქომ ბოიკოტი გამოუცხადა. დაუსრულებელ პროვოკაციულ, მტრულ და ცილისმწამებლურ კამპანიას საპატრიარქო მოთმინებით იტანდა წლების განმავლობაში, ხოლო როდესაც ღვთისმშობლისადმი შეურაცმყოფელ და მაცხოვარის მკრეხელურ მოხსენიებამდე მივიდა საქმე, მათთან თანამშრომლობა შეუძლებელი გახდა", — აღნიშნავს ჯაღმაიძე.

მისივე თქმით, უკანასკნელ დღეებში ცხადი გახდა, რომ საკუთარი თავის გადასარჩენად რუსთავი 2 მზად არის, მრავალ ადამიანს, მთლიანად საქართველოს შეუქმნას პრობლემები. მისივე განცხადებით, "საკუთარ თავზე აგრესიის გამოწვევის ტაქტიკა და საკუთარი თავის მსხვერპლად წარმოჩენის მცდელობა პირველად არ ხორციელდება მათი მხრიდან".

"შესაძლოა, აქამდე ვინმეს მიაჩნდა, რომ რ2-ისადმი ბოიკოტი მხოლოდ მათი საპატრიარქოსადმი დამოკიდებულებით იყო განპირობებული, თუმცა უკვე ნათელია, რომ ეკლესიის წინააღმდეგ ბრძოლა, მხოლოდ ერთი შემადგენელი ნაწილი და ერთგვარი ფორმაა მთელი საქართველოს მოსახლეობის წინააღმდეგ წარმოებული კამპანიისა", — დასძენს ჯაღმაიძე.

რუსთავი 2-ის პირდაპირ ეთერში წამყვანმა, გიორგი გაბუნიამ რუსეთის პრეზიდენტს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. გაბუნიას ქცევა არხმა კატეგორიულად დაუშვებლად მიიჩნია და გაემიჯნა. მთავრობის წარმომადგენლებმა კი ეს ქვეყნის წინააღმდეგ ომად შეაფასეს.