ვარდების რევოლუციის მონაწილე, ახლა კი ქართული ოცნების დეპუტატი ზვიად ძიძიგური ამბობს, რომ ვარდების რევოლუცია ეს იყო შევარდნაძის ხელისუფლების შეცვლა ძალადობრივი გზით. ამის შესახებ მან ტელეკომპანია პირველის ეთერში განაცხადა.

"მე ვარ ორი გადატრიალების მომსწრე საქართველოში. ერთი 1991-1992 წლებში, როდესაც ძალით მოხდა ხელისუფლების დამხობა და 20 წელი სისხლიანი კარუსელი ტრიალებდა საქართველოში. მეორე, ვარდების რევოლუციის მომსწრე გახლავართ, ე.წ რევოლუციის. შინაგან საქმეთა სამინისტროს გადაუარეს მაშინ დემონსტრანტებმა. რა თქმა უნდა, ვარდების რევოლუცია, ეს იყო შევარდნაძის ხელისუფლების შეცვლა ძალადობრივი გზით. მართალია სისხლი არ დაღვრილა, მაგრამ ამ ძალადობრივი გზით შეცვლამ არაფერი სიკეთე არ მოუტანა, ისევე როგორც ზვიად გამსახურდიას დამხობამ არ მოუტანა", — განაცხადა ძიძიგურმა.

ჟურნალისტის კითხვაზე, მონაწილეობდა თუ არა თავად ამ ძალადობრივ გადატრიალებაში, როგორც ვარდების რევოლუციის წევრი, ამბობს, რომ კი.

მისივე თქმით, პოლიტიკური სპექტრი ერთხელ და სამუდამოდ უნდა შეთანხმდეს იმაზე, რომ მხოლოდ მშვიდობიანი გზით უნდა მოხდეს ხელისუფლების შეცვლა.

ხელისუფლებიდან ზვიად ძიძიგური პირველი არ არის, რომელმაც ვარდების რევოლუციას ხელისუფლების ძალადობრივი გზით დამხობა უწოდა. მათ შორისაა, პრემიერ-მინისტრი, მამუკა ბახტაძე, მინისტრი მაია ცქიტიშვილი, პარლამენტის თავმჯდომარე, არჩილ თალაკვაძე.