ერთიანი საქართველო-დემოკრატიული მოძრაობის ლიდერი ნინო ბურჯანაძე ხელისუფლებას მოუწოდებს გამოიძიოს რუსთავი 2-ის პირდაპირ ეთერში P.S.-ის წამყვანის, გიორგი გაბუნიას მიერ რუსეთის პრეზიდენტის ვლადიმერ პუტინის გინება. ბურჯანაძის თქმით, ის, რაც გიორგი გაბუნიამ გააკეთა არის "სააკაშვილის მიერ დაგეგმილი ბინძური პროვოკაცია".

"ის, რაც გიორგი გაბუნიამ გააკეთა რუსთავი 2-ის ეთერში არ იყო არც ემოცია და არც უბრალოდ უზრდელობა. ეს იყო საგანგებოდ დაგეგმილი უმძიმესი პროვოკაცია საქართველოსა და ქართველი ხალხის წინააღმდეგ და მე დარწმუნებული ვარ, რომ ამ პროვოკაციის უკან დგას სააკაშვილი და ტექსტიც დიდი ალბათობით სააკაშვილის დაწერილია", — თქვა ნინო ბურჯანაძემ.

მან ასევე თქვა, რომ რუსთავი 2-ის წამყვანმა გადალახა ადამიანური, მორალური, ეროვნული და ტრადიციული ზღვარი და შეურაცხყოფა მიაყენა ქართველ ხალხს, საზოგადოებას, კულტურასა და ტრადიციებს. მისივე შეფასებით, ეს ყველაფერი 7-წლიანი კოჰაბიტაციის შედეგია.

"ამ კოჰაბიტაციის კულმინაციაა ის, რაც გუშინ მოხდა, ამიტომ კეთილი ინებოს საქართველოს დღევანდელმა ხელისუფლებამ და დაიწყოს ამ სპეცოპერაციის საგანგებო გამოძიება იმიტომ, რომ ეს არის დაგეგმილი პროვოკაცია საქართველოს ეროვნული ინტერესებისა და სახელმწიფოს წინააღმდეგ. გამოძიებულ იქნას, ვინ იდგა ამ პროვოკაციის უკან და რა იყო ჩაფიქრებული ამ პროვოკაციით. ეს არის აუცილებელი და ამას თუ არ გააკეთებს, ძვირად დაუჯდება", — თქვა მან.

კითხვაზე, აპირებს თუ არა რუსეთში ამ საკითხთან დაკავშირებით ვიზიტს, ნინო ბურჯანაძემ უპასუხა: "რუსეთის მხრიდან ასეთი რეაქცია სრულიად არ არის გასაკვირი. ეს არის ადეკვატური რეაგირება, ეს არის მთელი ერის შეურაცხყოფა და არა კონკრეტული ადამიანის. მე გავაგრძელებ ურთიერთობას რუსეთთან, რუს დეპუტატებთან, ხელისუფლებასთან იმისთვის, რომ ნაწილობრივ მაინც შერბილდეს პირდაპირი ღალატი საკუთარი ქვეყნისა".

პუტინის გინება, რუსთავი 2-ის პოზიცია და გამოხმაურებები

რუსთავი 2-ის პირდაპირ ეთერში წამყვანმა გიორგი გაბუნიამ რუსეთის ფედერაციის პრეზიდენტს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. გაბუნიას ქცევა არხმა დაუშვებლად მიიჩნია და გაემინჯა, მთავრობის წარმომადგენლებმა კი ქვეყნის წინააღმდეგ ომად შეაფასეს.

კახა კალაძემ თქვა, რომ ამას მკაცრი რეაგირება უნდა მოჰყვეს და ქვეყნისთვის საფრთხის შექმნას არ დაუშვებენ. მსგავსი შინაარსის განცხადებები ჰქონდათ პრემიერ-მინისტრსა და პარლამენტის თავმჯდომარესაც. ორივე მათგანმა აღნიშნა, რომ გაბუნიას გინება საფრთხეს ქმნის და ქვეყნის მტრობაა. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე".

რუსთავი 2 ამბობს, რომ გაბუნიას მიმართვას არხის თვითრეგულირების ორგანო განიხილავს, მთავრობის წარმომადგენლების მსავსი შეფასებები კი სარედაქციო პოლიტიკაში ჩარევად მიაჩნიათ.

გაბუნიას მიმართვა უკვე შეაფასა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

ამის ფონზე კი რუსთავი 2-თან აქცია გაიმართა, სადაც მოითხოვეს, რომ გაბუნიამ დატოვოს არხიც და ქვეყანაც. ანტიოპოზიციური და პროსახელისუფლებო ფეიჯები, ასევე, ძალადობრივი ჯგუფები და ქართული ოცნების მხარდამჭერები მოსახლეობას მოუწოდებენ, რომ "არ შეარჩიონ გაბუნიას" მომხდარი.„