ევროპული საქართველოს ერთ-ერთი ლიდერი, გიგი უგულავა P.S.-ში გიორგი გაბუნიას მონოლოგს ეხმიანება, რომელშიც წამყვანმა ვლადიმერ პუტინს აგინა.

"გაბუნიას ეპატაჟი იყო უხამსი, უგემოვნო, უადგილო, არა იმიტომ, რომ პუტინი, ოკუპანტი და ქართველთა მკვლელი, ამ სიტყვებს არ იმსახურებს და მისი გინებით არ იღვიძებს და იძინებს სრულიად ერი. არც იმიტომ რომ ხვალ ამისთვის დაგვბომბავენ. აგერ ვასიკო ოდიშვილი პუტინს ეთერში გაბუნიამდე აგინებდა და უფრო გემრიელადაც.

არამედ იმიტომ რომ უბრალოდ არაფრისმთქმელი გულის ფხანვაა და სისუსტის ნიშანია. იმიტომ რომ 18 ივლისს რუსთავი2-ის გადაწყვეტილებაა სტრასბურგში და აგერ ჩასაფრებულ კოლექტიურ ივანიშვილ-შალვარამიშვილს არ უნდა მისცე სალაპარაკო, რომ თავის ბოროტი ზრახვები განახორციელონ".

გიგი უგულავა ხაზს უსვამს იმას, რომ გაბუნიას განცხადების გამო "მთავრობის ჩინოსნები სიმყარეს გრძნობენ ფეხქვეშ", თუმცა ამან არ უნდა გადაფაროს რუსთაველზე მიმდინარე პროტესტის მთავარი მოთხოვნა - გიორგი გახარიას გადადგომა.

გიგი უგულავამ საკუთარ განცხადებას შალვა რამიშვილის სტატუსი დაურთო, სადაც ის რუსთავი 2-ის "დამთავრებისკენ" მოუწოდებს საზოგადოებას.

გაბუნიას გინება ეთერში და არხის პოზიცია

რუსთავი 2-ის გადაცემა პოსტსკრიპტუმის წამყვანმა, გიორგი გაბუნიამ რუსეთის ფედერაციის პრეზიდენტს, ვლადიმერ პუტინს აგინა. რუსულენოვან მიმართვაში მან არაეთიკურად და შეურაცხმყოფლად მოიხსენია პუტინის გარდაცვლილი დედაც. გენერალურმა დირექტორმა, ნიკა გვარამიამ კვირის აქცენტების სპეციალურ ეთერში განაცხადა, რომ მომხდარი კატეორიულად დაუშვებელი და მიუღებელია. არხი კატეგორიულად არ იზიარებს მსგავს დამოკიდებულებას.

გვარამიამ განმარტა, რომ არხი არ ეთანხმება გამოხატვის მსაგვს ფორმას, მიუხედავად იმისა, რომ გაბუნიას პოზიციას იზიარებს. მისი თქმით, ეს ქცევა არ შეესაბამება არხის სარედაქციო პოლიტიკას და მაღალ სტანდარტს.

გაბუნიას მიმართვა უკვე შეაფასა ეთიკის ქარტიამ. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს, შეზღუდოს გამოხატვის თავისუფლება.

გვარამიას განცხადებით, გამოხატვის მაღალი თავისუფლება, რომელსაც რუსთავი 2 ანიჭებს მასთან დასაქმებულს, ითვალისწინებს მაღალ პასუხისმებლობასაც და მომხდარს ტელევიზიის თვითრეგულირების ორგანო განიხილავს.