ქართული ოცნების დეპუტატი ნინო წილოსანი ფეისბუქზე წერს, რომ მიიღებს ბოდიშებს ყველასგან, "ვინც ამბობდა რომ ნიკა მელიას დაპატიმრებას დაუჭირა მხარი პარლამენტმა". ნინო წილოსანი ერთ-ერთი იყო, ვინც პროკურატურის მიმართვას მხარი დაუჭირა. დეპუტატი წერს, რომ პარლამენტმა მხოლოდ მისცა უფლება პროკურატურას მიემართა სასამართლოსთვის და უკვე სასამართლოს ემსჯელა აღკვეთის ღონისძიებაზე:

"არაუშავს, ეს მხოლოდ არცოდნის ბრალია..."

საქართველოს პარლამენტმა პროკურატურას ნაციონალური მოძრაობის დეპუტატის, ნიკა მელიას დაკავების უფლება მისცა. მმართველი გუნდის 91 დეპუტატმა, მათ შორის ნინო წილოსანმა პროკურატურის მიმართვას მხარი დაუჭირეს.

დღეს, 27 ივნისს თბილისის საქალაქო სასამართლომ პარლამენტის დეპუტატ ნიკა მელიას 30 ათასი ლარის ოდენობის გირაო შეუფარდა. გარდა ამისა, მოსამართლემ მას სხვა შეზღუდვების დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

ნიკა მელიას ბრალად ედება: ჯგუფური მოქმედების ხელმძღვანელობა, რასაც თან ახლდა ძალადობა, რბევა, სხვისი ნივთის დაზიანება და განადგურება, იარაღის გამოყენებით ხელისუფლების წარმომადგენლისადმი წინააღმდეგობა და მათზე თავდასხმა; ჯგუფურ მოქმედებაში მონაწილეობა, რასაც თან ახლდა ძალადობა, რბევა, სხვისი ნივთის დაზიანება და განადგურება, იარაღის გამოყენებით ხელისუფლების წარმომადგენლისადმი წინააღმდეგობა და მათზე თავდასხმა.