იურიდიულ და საპროცედურო საკითხთა კომიტეტების სხდომაზე, სადაც ნაციონალური მოძრაობის დეპუტატის, ნიკა მელიასთვის იმუნიტეტის შეჩერების საკითხს განიხილავენ დეპუტატებს პროკურატურის მტკიცებულებათა ერთობლიობა არ აქვთ. ამის შესახებ კომიტეტის თავმჯდომარეს ევროპული საქართველოს დეპუტატმა, ოთო კობახიძემ მიმართა.

"პატივცემულმა წარმომადგენელმა პროკურატურის გვითხრა, რომ მტკიცებულებათა ერთობლიობით დასტურდება, რომ ნიკა მელიამ ჩაიდინა დანაშაულებრივი ქმედება, მაგრამ დეპუტატებს ისევ არ გვაქვს ეს მტკიცებულებები", — განაცხადა მან.

პასუხად, საპროცედურო კომიტეტის თავმჯდომარემ, გაგა კახიანმა განაცხადა, რომ ამ საკითხზე კობახიძემ არაერთხელ აღნიშნა და "იგივე წრეზე" არ უნდა წავიდნენ. მისი თქმით, დეპუტატებმა უნდა დასვან კითხვები პროკურორს და მიიღებენ პასუხებს. განხილვაში ჩაერთო კომიტეტის თავმჯდომარე, ანრი ოხანაშვილიც, რომელმაც განაცხადა, რომ მტკიცებულებების მოკვლევა პარლამენტის ლეგიტიმაცია არ არის.

"ჩვენ ხო არა ვართ სასამართლო, რომ გამოვიკვლიოთ მტკიცებულებები და პროცესი წარვმართოთ, თითქოს სასამართლოში ვართ", — განაცხადა ოხანაშვილმა, მის პასუხად კი კობახიძემ თქვა:

"ანუ, ზეპირად ვენდობით, ნოტარიუსები ვართ ანუ? იქნება იტყუება? ეს ზეპირი პროცესია? მართლა ტროიკა ხო არ არის, არ გამაგიჟოთ ახლა. მამუკა, მტკიცებულებები არ გვჭირდება, თანხმობა ისე უნდა მივცეთ? ანუ ზეპირად ვენდობით, რასაც გვეუბნება პროკურატურა?".

პარლამენტში მელიას იმუნიტეტის საკითხის განხილვა დაძაბულ რეჟიმში მიმდინარეობს. ადევნეთ თვალი პირდაპირ ეთერს კომიტეტების სხდომიდან.

20 ივნისის აქციაზე ძალადობრივი ჯგუფის ხელმძღვანელობისა და მასში მონაწილეობის ბრალდებასთან დაკავშირებით გუშინ, 25 ივნისს პროკურატურაში ბრიფინგი გაიმართა. უწყებაში ნაციონალური მოძრაობის ლიდერის, ნიკა მელიას წინააღმდეგ მიმდინარე საქმეზე ისაუბრეს. პროკურორის თქმით, მათ მიმართეს პარლამენტს, რათა მიიღონ ნებართვა დეპუტატის დაკავებაზე. მელიას იმუნიტეტი იცავს და მის დასაკავებლად პარლამენტის თანხმობაა საჭირო.

ამავე თემაზე: