ქართული ოცნების მაჟორიტარი დეპუტატი კახა ოქრიაშვილი აცხადებს, რომ მაჟორიტარული სისტემა პროპორციულით არ უნდა შეიცვალოს, რადგან პარლამენტში "უფრო მეტი პოლიტიკური ცირკი" იქნება.

"თქვენ ხედავთ დღეს რაც მოხდა აშკარაა რომ პოლიტიკური იდიოტების პროცენტი ძალიან მაღალია საქართველოს პარლამენტში და იმის შემდეგ როცა გადავალთ პროპორციულ სისტემაზე პოლიტიკური იდიოტების რიცხვი გაიზრდება, ასე რომ ცირკებს უფრო მეტს ვნახავთ მომავალში", — განაცხადა კახა ოქრიაშვილმა.

ის ვადამდელ არჩევნებს ითხოვს და ამბობს, რომ "კარგი იქნებოდა".

"მთავრობა უნდა გადადგეს და რიგგარეშე არჩევნები უნდა გამოვაცხადოთ", — ამბობს ოქრიაშვილი.

ის ასევე გამოეხმაურა 20-21 ივნისის აქციას და თქვა, რომ გამოძიება უნდა ჩატარდეს და დასკვნები შემდეგ უნდა გამოიტანონ.

24 ივნისს ქართული ოცნების თავმჯდომარემ ბიძინა ივანიშვილმა 2020 წლის საპარლამენტო არჩევნების ჩატარება სრულად პროპორციული წესით, ნულოვანი (ბუნებრივი) ბარიერით დააანონსა. ახალი წესით, ბუნებრივი ბარიერის პირობებში, პარლამენტში პარტიებისთვის ერთი მანდატის მისაღებად, შესაძლოა, დაახლოებით 0,67%-იანი ბარიერის გადალახვა იყოს საჭირო.