"აქციაზე ორი ლოზუნგია გამოკრული: ჩვენი მთავრობა ხალხია და ჩვენი მტერია რუსეთი. ის რაც მოხდა 20 ივნისს ღამით, ჩვენ დავღალეთ ჩვენი მთავრობა — ხალხი და გავახარეთ მტერი", — ამის შესახებ ჯანდაცვის კომიტეტის თავმჯდომარემ, აკაკი ზოიძემ პლენარულ სხდომაზე განაცხადა.

"გავახარეთ მტერი, რომელსაც აქვს ისედაც გახარების საფუძველი გუშინდელი ევროსაბჭოს გადაწყვეტილების შედეგად, როდესაც რუსეთს ხმა დაუბრუნეს. არანაკლებ გახარებულია ის მტერი, ის რეჟიმის, რომელსაც საქართველოს დამოუკიდებლობა ეჩხირება კისერში. პასუხისმგებლობა ამ ყველაფერზე, რაც მოხდა, არის ყველასი... იმ დაკარგულ თვალს და იმ დასახიჩრებულ ახალგაზრდებს პასუხი უნდა გავცეთ", — განაცხადა აკაკი ზოიძემ.

პარლამენტარი ამბობს, რომ თავისი წილი პოლიტიკური პასუხისმგებლობა ქართულმა ოცნებამ უკვე აიღო. მისივე თქმით, მთავარი პოლიტიკური პასუხისმგებლობა საკუთარ თავზე ოპოზიციამ უნდა აიღოს, რომელმაც "აქციის მონაწილეები წააქეზა".

20 ივნისის აქციის შემდეგ პარლამენტში პირველი პლენარული სხდომა მიმდინარეობს. სხდომა ოპოზიციასა და მმართველ გუნდს შორის დაპირისპირებით დაიწყო.