რესპუბლიკელების ლიდერი, დავით უსუფაშვილი ფარულ ჩანაწერებსა და ქვეყანაში დაგეგმილ შესაძლო დესტაბილიზაციას ეხმაურება. ის ამბობს, რომ ხელისუფლების სათავეში არა ქუჩის ბრძოლაში გამარჯვებული პარტია, არამედ არჩევნებზე გამარჯვებული უნდა მოვიდეს:

"სამართალდამცავი ორგანოები უნდა ებრძოდნენ კრიმინალს და კრიმინალებს და არ უნდა ელოდებოდნენ YouTube-ზე ვინმე როდის ატვირთავს თუ არ ატვირთავს რაიმე მასალას. ასე რომ, მე ვურჩევ ყველას წავიკითხოთ კონსტიტუცია და ვიმოქმედოთ ასე. არჩევნებში გამარჯვებული პარტია და არა ქუჩის ბრძოლებში გამარჯვებული პარტია უნდა მოვიდეს ხელისუფლებაში".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული.

აღნიშნულთან დაკავშირებით სახელმწიფო უსაფრთხოების სამსახურმა გამოძიება სისხლის სამართლის კოდექსის 315-ე მუხლის 1-ლი ნაწილით დაიწყო.