მმართველი პარტიის დეპუტატი არჩილ თალაკვაძე აცხადებს, რომ ქართული ოცნება ირაკლი კობახიძის გადადგომის საკითხს არ დააყენებს და არც მხარს დაუჭერს ოპოზიციიის იდეას. ამის შესახებ მან TV პირველის ეთერში ისაუბრა.

წამყვანების კითხვაზე, "ვის გადაატყდება ჯოხი", თალაკვაძე პასუხობს, რომ ჯოხის გადატეხვა ამ შემთხვევაში "ადეკვატური გამოსავალი" არ არის. ის არ პასუხობს კითხვას გარიცხავენ თუ არა ზაქარია ქუცნაშვილს.

თალაკვაძე ამბობს, რომ როგორც ქართული ოცნების ლიდერს არ აქვს უფლება გუნდთან შეუთანხმებელი პოზიციით ისაუბროს. მისი თქმით, პარტიის მომდევნო სხდომაზე მომხდარს განიხილავენ და საპასუხო ზომებს გაატარებენ.

პარლამენტში ასამბლეის ჩატარებას პროტესტი მოყვა, რადგან მას რუსეთის დუმის დეპუტატი სერგეი გავრილოვი უძღვებოდა, რომელიც პარლამენტის თავმჯდომარის სკამზე დაჯდა. ოპოზიციური პარტიების კრიტიკის გარდა, მთავრობა და თავად ღონისძიების ორგანიზატორი ზაქარია ქუცნაშვილი საზოგადოების მწვავე კრიტიკის ობიექტიც გახდა.

ნაციონალური მოძრაობისა და ევროპული საქართველოს დეპუტატებმა პარლამენტის თავმჯდომარის გადაყენება მოითხოვეს. როგორც On.ge-ს პარლამენტის პრესსამსახურში განუცხადეს, კობახიძე გადადგომას არ აპირებს.