საქართველოს პარლამენტში მართლმადიდებლობის ასამბლეის ჩატარების ნებართვა ირაკლი კობახიძემ გასცა. On.ge-ს წყარომ მიაწოდა დოკუმენტები, რომელშიც ჩანს, რომ პარლამენტის თავმჯდომარემ ხელი მოაწერა სამუშაო გეგმას ასამბლეის ჩასატარებლად. ამავე დოკუმენტში წერია, რომ "საერთო პასუხისმგებლობა" ღონისძიების ჩატარებაზე საქართველოს პარლამენტის აპარატის უფროსს, გივი მიქაძეს დაეკისრა.

გეგმის მიხედვით, ქართულმა მხარემ უზრუნველყო ასამბლეის წევრების დახვედრა, ტრანსპორტირება, მათთვის სამსახსოვრო საჩუქრები, ყავა და ჩაი პარლამენტის სასადილოში, რუსულ-ქართულენოვანი სინქრონული თარგმანი, ჩურჩხელის ამოვლებისა და ჭაჭის გამოხდის მასტერკლასი და სხვა აქტივობები. დოკუმენტის მიხედვით, ღონისძების ხარჯები პარლამენტმა დაფარა.

პარლამენტში ასამბლეის ჩატარებას პროტესტი მოყვა, რადგან მას რუსეთის დუმის დეპუტატი სერგეი გავრილოვი უძღვებოდა, რომელიც პარლამენტის თავმჯდომარის სკამზე დაჯდა. ოპოზიციური პარტიების კრიტიკის გარდა, მთავრობა და თავად ღონისძიების ორგანიზატორი ზაქარია ქუცნაშვილი საზოგადოების მწვავე კრიტიკის ობიექტიც გახდა.

მმართველი პარტიის დეპუტატების ნაწილი ამტკიცებდა, რომ მათ ამ ღონისძიებაზე ინფორმაცია არ ჰქონდათ. მამუკა მდინარაძემ კი განაცხადა, რომ თავმჯდომარის სავარძელში გავრილოვის დაჯდომა შეთანხმებული არ იყო. მისი თქმით, ეს იმდენად მიუღებელი მოვლენა იყო, რომ ამის გამო სესია პარლამენტში ვეღარ გაგრძელდებოდა. რაც შეეხება პარლამენტის თავმჯდომარეს, მან განაცხადა, რომ სავარძელზე გავრილოვის დაჯდომის შესახებ როგორც კი გაიგო, მაშინვე მოითხოვა სესიის შეჩერება.

მართლმადიდებლობის საერთაშორისო ასამბლეა უკვე ერთი წელია იგეგმება. რუსი დეპუტატების ჩამოსვლის შესახებ კი ინფორმაცია ევროპულმა საქართველომ 3 დღის წინ გაავრცელა.

აქედან გამომდინარე, საპროტესტო აქციის მონაწილეები აცხადებენ, რომ სესიის სხვაგან გადატანა გამოსავალი არ არის. ისინი მოითხოვენ, გავრილოვმა და რუსმა დეპუტატებმა დატოვოს ქვეყანა. ასევე, მოითხოვენ დადგეს ირაკლი კობახიძს პასუხისმგებლობის საკითხი.