საქართველოს საგარეო საქმეთა სამინისტროს წარმომადგენელმა, ვლადიმერ კონსტანტინიდმა ბრიფინგზე ელჩების გადადგომა არ დაადასტურა და მოქალაქეებს მოუწოდა, რომ პროვოკაციული ინფორმაცია არ გაავრცელონ.

"გაიჟღერა ინფორმაციამ, მათ შორის სოციალურ ქსელებში, რომ საქართველოს ერთ-ერთმა ელჩმა განვითარებული მოვლენების ფონზე დატოვა თანამდებობა. აღნიშნული წარმოადგენს დეზინფორმაციას. საგარეო საქმეთა სამინისტროს ყველა ქვედანაყოფი როგორც საელჩოები, ისე საკონსულოები ჩვეულ რეჟიმში აგრძელებენ საქმიანობას", — აღნიშნა ვლადიმერ კონსტანტინიდმა.

მან ასევე თქვა, რომ საგარეო უწყებას მართლმადიდებლობის საპარლამენტთაშორისო ასამბლეის მსგავსი ფორმატით ორგანიზებაში მონაწილეობა არ მიუღია და პიროვნების საზღვარზე გადაადგილება მათ კომპეტენციას სცილდება.

"რა საკვირველია, საგარეო საქმეთა სამინისტროსთვის ცნობილი იყო ბატონი გავრილოვის პოლიტიკური გემოვნების შესახებ საგარეო საქმეთა სამინისტროს აღნიშნული ღონისძიების ორგანიზებაში მონაწილეობა არ მიუღია", — თქვა კონსტანტინე გავრილოვმა.

მართლმადიდებლობის საპარლამენტთაშორისო ასამბლეა თბილისში გუშინ 19 ივნისს გაიხსნა. დღეს, 20 ივნისს რუსული დელეგაციის პარლამენტის პლენარულ დარბაზში მისვლამ და რუსი დეპუტატის მიერ სხდომის წაყვანამ გააღიზიანა საზოგადოება. ასამბლეის წევრი, სერგეი გავრილოვი პარლამენტში, ირაკლი კობახიძის სავარძელში ჩაჯდა. სწორედ ამ ფაქტმა გამოიწვია ოპოზიციონერი დეპუტატებისა და მოქალაქეების პროტესტი.

გუშინ 19 ივნისს პრეზიდენტის ყოფილ სასახლეში სერგეი გავრილოვმა განაცხადა, რომ "2008 წლის ომი ისტორიაა, რომლისგანაც გაკვეთილები უნდა ვისწავლოთ". მანვე აღნიშნა, რომ ეს იყო უსიამოვნება, რომლის "ინიციატორები ახლა საქართველოში არ იმყოფებიან". ამის შესახებ მან რუსთავი 2-თან ისაუბრა. გავრილოვმა აღნიშნა ისიც, რომ საქართველოსა და რუსეთს შორის ბევრი უსიამოვნება იყო, მაგრამ პრობლემების მოგვარება შესაძლებელია. ასამბლეაზე მან ისაუბრა იმაზეც, რომ მსოფლიოს ძალიან ბევრი პრობლემა აქვს და ამ სიტუაციაში ძალის პოზიციიდან საუბარი და სანქციების დაწესება არასწორია. მისი თქმით, მსოფლიო მართლმადიდებლობის ირგვლივ უნდა გაერთიანდეს.

საქართველოს პარლამენტს მართლმადიდებლობის საპარლამენტთაშორისო ასამბლეაში მუდმივმოქმედი დელეგაცია 2013 წლიდან ჰყავს.