პარლამენტის თავმჯდომარე, ირაკლი კობახიძე ამბობს, რომ მის სავარძელზე რუსი დეპუტატის, სერგეი გავრილოვის დაჯდომის შესახებ როგორც კი გაიგო, მაშინვე მოითხოვა სესიის შეჩერება. ამის შესახებ კობახიძემ ბაქოში განაცხადა, სადაც ვიზიტით იმყოფება.

მისივე თქმით, რუსეთი არის ქვეყანა, რომელსაც ოკუპირებული აქვს საქართველოს ოცი პროცენტი და ამ ქვეყნის წარმომადგენლის პარლამენტის თავმჯდომარის სკამზე ჯდომა არის მძიმე სანახავი.

"სამწუხაროდ, არ მქონდა მყისიერად საჯაროდ რეაგირების საშუალება გამომდინარე იქიდან, რომ არ ვარ საქართველოში, შემატყობინეს ამ ფაქტის თაობაზე და როგორც კი შევიტყვე, მაშინვე მოვითხოვე სესიის შეჩერება და ასეთი ფორმით სესიის გაგრძელების არ დაშვება", — თქვა კობახიძემ.

მისივე განცხადებით, რუსეთი რომ ოკუპანტია, ამაზე გუშინაც ისაუბრა მართლმადიდებლობის საპარლამენტთაშორისო ასამბლეის სესიის გახსნაზე.

"ამაზე ჩვენ ყურადღება გავამახვილეთ გუშინაც, როცა ვმონაწილეობდი სესიის გახსნაში და იმ ქმედებებს, რომელიც მომდინარეობს რუსეთის ფედერაციიდან, არა აქვს არანაირი საერთო არც ქრისტიანობასთან და არც მართლმადიდებლობასთან", — აღნიშნა კობახიძემ.