ჯანდაცვის მინისტრის თანამდებობაზე დავით სერგეენკო ეკატერინე ტიკარაძემ შეცვალა.

ის 2015 წლის სექტემბრიდან საჩხერის რაიონული საავადმყოფოსა და მმართველი არასამეწარმეო პირის, "დოსტაქარის" დირექტორი იყო.

ეკატერინე ტიკარაძე საჩხერის საავადმყოფოში 2009 წლიდან მუშაობდა, როგორც მიწვეული კონსულტანტი. კლინიკის დირექტორის თანამდებობაზე ის ჯანდაცვის უკვე ყოფილმა მინისტრმა, დავით სერგეენკომ დანიშნა.

მანამდე ეკა ტიკარაძე მუშაობდა გერმანიის ერთ-ერთ კლინიკაში. ის გერმანული Donau-Universität Krems-ის კურსდამთავრებულია.

ჯანდაცვის უკვე ყოფილმა მინისტრმა დავით სერგეენკომ საქართველოს მთავრობის ადმინისტრაციაში გამართულ ბრიფინგზე განაცხადა, რომ ეკატერინე ტიკარაძეს მინისტრის თანამდებობაზე რეკომენდაცია თავად გაუწია და საკადრო ცვლილებების ინიციატორიც თავად იყო.

ახალმა მინისტრმა თქვა, რომ ღელავს და გრძნობს დაკისრებულ პასუხისმგებლობას.

"ჩვენ დღეს შეგვიძლია ვთქვათ, რომ ჯანდაცვის სისტემის რეფორმის პირველი ფაზა ნამდვილად წარმატებით დასრულდა, რაც აუცილებლად უნდა აღვნიშნოთ, რომ ჩვენი გუნდის და ბატონი დავითის დამსახურებაა. ჩვენი შემდგომი ეტაპი არის მეორე ეტაპის განხორციელება, რომელიც გულისხმობს მეტად ეფექტურ და მიზნობრივ მართვას", — თქვა ახალმა მინისტრა.

მისივე განცხადებით, პრიორიტეტულად რჩება ჯანდაცვაში ისეთი საკითხები, როგორიცაა პაციენტის უფლებების დაცვა, მკურნალობის მაღალი ხარისხი.

"ჩვენთვის მნიშვნელოვანია ფარმაცევტული ბაზრის იმგვარი მოწესრიგება, რომ ჩვენი მოქალაქეებისთვის ხელმისაწვდომი გახდეს მაღალხარისხიანი მედიკამენტები, ასევე მთელი რიგი პრობლემები დაკავშირებული სოციალურ სფეროსთან, დევნილებთან და შრომის უსაფრთხოებასთან დაკავშირებით ჩვენთვის კვლავ რჩება დიდ გამოწვევად", — განაცხადა ტიკარაძემ.

ამავე თემაზე: