ჯანდაცვის უკვე ყოფილმა მინისტრმა დავით სერგეენკომ მთავრობის ადმინისტრაციაში გამართულ ბრიფინგზე თქვა, რომ მისი ინიციატივა იყო პოსტის დატოვება. ამის შესახებ მან დღეს, 18 ივნისს განაცხადა:

"მე ვთხოვე პრემიერს, რომ განგვეხილა ასეთი ცვლილებები, რათა უკეთესი შედეგი მიგვეღო. მე გავუწიე რეკომენდაცია ქალბატონ ეკას [ტიკარაძეს], რადგან 10 წელზე მეტია თანამშრომლობის გამოცდილება გვაქვს, ძირითადად ჯანდაცვის მენეჯმენტის სფეროში. მე მჯერა, ეს არ არის ერთჯერადი შეხედულება, ანალიზზე დაფუძნებულად მჯერა, რომ ასე უკეთესად განვითარდება რეფორმები. ერთის მხრივ, მეც მეტი საშუალება მექნება, რომ სტრატეგიულ დაგეგმარებაზე და განვითარებაზე ვიყო კონცენტრირებული და მხარში ამოვუდგე პრემიერს და ახალ ჯანდაცვის მინისტრს. მეორეს მხრივ ქალბატონ ეკას ექნება საშუალება რომ თავისი ცოდნა და განვითარება მოახმაროს ამ მართლაც რთული სისტემის მართვას".

დავით სერგეენკო პრემიერ-მინისტრ მამუკა ბახტაძის მრჩევლად დაინიშნა. მინისტრის პოსტზე კი მას საჩხერის საავადმყოფოს დირექტორი ეკატერინე ტიკარაძე შეცვლის.

დავით სერგეენკო ჯანდაცვის მინისტრის თანამდებობას ქართული ოცნების ხელისუფლებაში მოსვლიდან, 2012 წლის ოქტომბრიდან იკავებდა. პროფესიით ექიმი დავით სერგეენკო მინისტრობამდე საჩხერის საავადმყოფო-პოლიკლინიკური გაერთიანებაში გენერალურ დირექტორად მუშაობდა.

მისი მინისტრობის პერიოდს უკავშირდება C ჰეპატიტის ელიმინინაციისა და საყოველთაო ჯანდაცვის პროგრამები. ამასთანავე მისი მინისტრობის დროს უკეთესი სამუშაოები პირობებისთვის სოციალური მუშაკები გაიფიცნენ.