"დიდება ღმერთს", — ასე გამოეხმაურა პატრიოტთა ალიანსის დეპუტატი ემზარ კვიციანი ბიზნესმენ ლევან ვასაძის ძალადობრივ მოწოდებასა და მუქარას. ეს სიტყვები მან საკუთარ ფეისბუქგვერდზე დაპოსტა.

ლევან ვასაძემ მთავრობისა და ლგბტ აქტივისტებისადმი მუქარა კანცელარიასთან მიმდინარე აციისა და კონტრაქციის მეორე დღეს გაავრცელა. ის ამბობს, რომ ლგბტ თემის არანაირ აქტივობას არ დაუშვებენ, ნებისმიერ კორდონს გაარღვევენ და "წალეკავენ" ყველას.

"ბრძანების გამცემ ბატონ ბიძინას, ივანიშვილს და ყველას, ვინც საქართველოს სათავეშია მინდა ვუთხრა: არაფერი შეგეშალოთ, ჩვენ არ მოგცემთ თქვენ უფლებას კორდონების ჩაყენების ამ კვირაში და მაგათ მიერ რაიმე აქტივობის ჩატარებისა. კინოთეატრში იქნება ეს, როგორც უკვე ვთქვი, სკვერში, ქუჩაზე, მთაზე, ტბაში თუ ტყეში. ყველგან მოგაკითხავთ, ყველა კორდონს გავარღვევთ და წაგლეკავთ", — იმუქრება ვასაძე.

ვიდეომიმართვაში, რომელიც ჰომოფობიური, ქსენოფობიური, დისკრიმინაციული და სექსისტური შინაარსისაა ბიზნესმენი მოუწოდებს "ქუდზე კაცებს", რომ 16 ივნისს შეიკრიბონ და საქართველოში წესრიგის დაცვის სამოქმედო გეგმას გააცნობს.

"მე ვთხოვ ქალბატონებსა და ბავშვებს, ვერავის ვერ აუკრძალავ იქ მოსვლას, მარამ იქ კაცების გასაკეთებელი საქმეა, დარჩით სახლში. მე ვეძახი მამაკაცებს", — ამბობს ის.