უკრაინაში ვიზიტით მყოფი ეროვნული ბიბლიოთეკის წარმომადგენლები უკრაინის ღვინის ერთ-ერთი უდიდესი მწარმოებელი კომპანიის შაბოს წარმომადგენლებს შეხვდნენ. უკრაინული კომპანია და ეროვნული ბიბლიოთეკის ვაზისა და ღვინის ბიბლიოთეკა პარტნიორები გახდნენ.

"წინ დიდი გეგმები გვაქვს. უკრაინაში, შაბოს შესანიშნავ მუზეუმ-საწარმოში კომპანიის დამფუძნებელმა ვაჟა იუკურიძემ გვიმასპინძლა და მასთან ერთად სამომავლო გეგმებიც დაისახა", - განაცხადა ეროვნული ბიბლიოთეკის დირექტორმა გიორგი კეკელიძემ.

ფოტო: ეროვნული ბიბლიოთეკა

"ეროვნული ბიბლიოთეკის ვაზისა და ღვინის ბიბლიოთეკა არის სამკითხველო დარბაზი, სადაც ბეჭდური და ელექტრონული ფორმით არის შესაძლებელი ღვინოზე, ვაზზე და მომიჯნავე კულტურებზე ლიტერატურის გაცნობა. ეროვნული ბიბლიოთეკის ვაზისა და ღვინის დარბაზი ქმნის ქართველი მეღვინეების ციფრულ ბაზას, სადაც შეტანილი იქნება ყველა ქართველი მეღვინის ბიოგრაფია", - ამბობს ეროვნული ბიბლიოთეკის ვაზისა და ღვინის ბიბლიოთეკის კურატორი ბესო ბაჯელიძე.

ბესო ბაჯელიძე მოუწოდებს საზოგადოებასა და დაინტერესებულ პირებს, რომ მიაწოდონ მათი ან მათი წინაპრების ბიოგრაფიები ფოტოსთან ერთად.

"გარდა ამისა, ვაზისა და ღვინის დარბაზი აქტიურად აგროვებს მეღვინეობა-მევენახეობასთან დაკავშირებულ ფოტომასალასაც. სურვილის შემთხვევაში, შეგიძლიათ ელექტრონულ მისამართზე [email protected] გამოგვიგზავნოთ მსგავსი ტიპის ფოტომასალის ციფრული ვერსია, სასურველია, აღწერილობასთან ერთად ან დაგვიკავშირდეთ მისამართზე: ეროვნული ბიბლიოთეკის მესამე კორპუსი, გუდიაშვილის 7. ჩვენი მობილური ჯგუფი თქვენთვის ხელსაყრელ ადგილას გააციფრებს ფოტომასალას. ფოტოები დარჩება თქვენს მფლობელობაში, ბიბლიოთეკას კი ციფრული ვერსია გადაეცემა" - აცხადებს ეროვნული ბიბლიოთეკის ვაზისა და ღვინის ბიბლიოთეკის კურატორი ბესო ბაჯელიძე.