ქართული ოცნების აღმასრულებელი მდივანი, ირაკლი კობახიძე აცხადებს, რომ 10 საათის მონაცემებით ამომრჩევლების აქტივობა მთაწმინდის ოლქში პირველ ტურთან შედარებით 31 პროცენტით მაღალია.

მისივე თქმით, ოპონენტების მხრიდან უსაფუძვლო განცხადებები კეთდება "არარსებულ დარღვევებთან დაკავშირებით", რასაც ქართული ოცნება "მიჩვეულია".

"ეს არის პროცესში გარკვეული დაძაბულობის შეტანის მცდელობა, ამასაც მიჩვეულები ვართ და ვიცით, რისი ნიშანია. ეს არის ყოველთვის იმის ნიშანი, რომ ჩვენი ოპონენტები იბრძვიან არა გამარჯვებისთვის, არამედ გარდაუვალი დამარცხებისთვის. მოვუწოდებთ, რა თქმა უნდა, ოპონენტებს შეინარჩუნონ სიმშვიდე და მისცენ როგორც ამომრჩეველს, ისე საარჩევნო ადმინისტრაციის წარმომადგენლებს მუშაობის საშუალება", — განაცხადა ირაკლი კობახიძემ.

პარტიის აღმასრულებელმა მდივანმა საარჩევნო უბნებთან სიებით მდგომ კოორდინატორებზეც ისაუბრა. ის ამბობს, რომ ეს ამომრჩევლების მობილიზების პრაქტიკაა, რაც დემოკრატიულ პროცესს უზრუნველყოფს.

"ეს არის პრაქტიკა, რომელიც არის მნიშვნელოვანი და ამ პრაქტიკით მუშაობენ არა მხოლოდ საქართველოში, არამედ ძალიან განვითარებულ დემოკრატიულ ქვეყნებში. მთავარია, მობილიზებამ არ შეიძინოს ამომრჩეველზე ზეწოლის სახე და ეს უნდა ავირიდოთ თავიდან. თუმცა თქვენ ხედავთ, რომ ზეწოლა არ ხორციელდება. რაც მეტ ამომრჩეველს გამოიყვანენ პოლიტიკური პარტიები საარჩევნო უბნებზე, მით უკეთესი საარჩევნო პროცესისთვის. ამის გაკეთება შეუძლიათ ჩვენს ოპონენტებს, ისინიც აკეთებენ ამას და ჩვენც. ეს არის ამომრჩევლის მობილიზება და ამაში კანონდარღვევა არაფერია", — განაცხადა კობახიძემ.

მან თქვა, რომ საარჩევნო უბნებიდან სიებით მყოფი კოორდინატორების დისტანციაზე შეზღუდვა საარჩევნო კოდექსში შეტანილი ცვლილების დროს მოიხსნა და ახალ ცვლილებების მუშაობის დროს, ამ საკითხს განიხილავენ.

მთაწმინდის საარჩევნო ოლქში მეორე ტური ლადო კახაძესა და შალვა შავგულიძეს შორის იმართება. პირველ ტურში ქართული ოცნების კანდიდატმა, ვლადიმერ კახაძემ ხმების 41 პროცენტი (6 036 ხმა) მიიღო, მისმა კონკურენტმა თავისუფალი დემოკრატებისა და ევროპული საქართველოს საერთო კანდიდატმა, შალვა შავგულიძემ — 36,83% (5 422 ხმა).