რუს გამომძიებელ ჟურნალისტს ივან გოლუნოვს ბრალი დიდი რაოდენობით ნარკოტიკების გასაღების მცდელობაში წაუყენეს. ამის შესახებ რადიო თავისუფლება წერს. რუსი და საერთაშორისო ჟურნალისტები და უფლებადამცველი ორგანიზაციები ამბობენ, რომ ის "ჟურნალისტური საქმიანობისთვის ისჯება".

ინტერნეტგამოცემა "მედუზას" ჟურნალისტი სამართალდამცველებმა მოსკოვში ორი დღის წინ დააკავეს და სცემეს. გამოძიება მას ნარკოტიკებით ვაჭრობაში ადანაშაულებს. ადვოკატების მტკიცებით, ნარკოტიკული საშუალება გოლუნოვს მანქანაში დაკავების დროს ჩაუდეს.

36 წლის ჟურნალისტი თავისი საგამოძიებო საქმიანობით არის ცნობილი. ის ხშირად მოსკოვის პოლიტიკურ ელიტაში კორუფციის ფაქტებს ამხელდა. გამოცემას სჯერა, რომ მისი დაკავება სწორედ მის საგამოძიებო საქმიანობას უკავშირდება.

მედუას გენერალურმა დირექტორმა, გალინა ტიმჩენკომ და მთავარმა რედაქტორმა, ივან კოლპაკოვმა განცხადება გაავრცელეს და გოლუნოვის გათავისუფლება მოითხოვეს.

"ჩვენ გვჯერა, რომ ივან გოლუნოვი უდანაშაულოა. უფრო მეტიც, ჩვენ ყველა მიზეზი გვაქვს დავიჯეროთ, რომ ის მისი ჟურნალისტური საქმიანობის გამო გახდა სამიზნე. ვიცით, რომ ბოლო თვეების განმავლობაში ემუქრებოდნენ. ჩვენ ვიცით, რატომ ემუქრებოდნენ და დევნიდნენ მას", — ნათქვამია განცხადებაში.

მოსკოვის სასამართლოსთან რამდენიმე ჟურნალისტი შეიკრიბა ბანერებით: "მე ჟურნალისტი ივან გოლუნოვი ვარ, მეც დამიჭირე". აქტივისტები ჟურნალისტის გათავისუფლებას მოითხოვენ.

აქცია 7 ივნისს მოსკოვის პოლიციის მთავარ სამმართველოსთანაც გაიმართა. აქცია დაკავებებით დასრულდა. სულ 11 ჟურნალისტი დააკავეს, მათ შორის ბევრი ცნობილი.

რადიო თავისუფლება წერს, რომ მოსკოვის მერი, სერგეი სობიანი პრეზიდენ, ვლადიმერ პუტინთან დაახლოებული პირია.

რუსმა ოპოზიციონერმა პოლიტიკოსმა და ანტისაოკუპაციო კამპანიის წარმომადგენელმა ალექსეი ნავალნიმ თქვა, რომ გოლუნოვის დაკავება " პოლიტიკურად მოტივირებულია".

მედიის საკითხებზე მომუშავე არასამთავრობო ორგანიზაციები კი შიშობენ, რომ გოლუნოვის დაკავება რუსეთში მედიის თავისუფლების წინააღმდეგ მიმართული ნაბიჯია.