ჩინეთის პრეზიდენტმა, სი ძინპინმა რუსეთში ვიზიტისას ვლადიმერ პუტინს ახლო მეგობარი და კარგი კოლეგა უწოდა. სი ძინპინი მოსკოვში 5 ივნისს სამდღიანი სახელმწიფო ვიზიტით ჩავიდა. სამიტი ძირითადად ქვეყნებს შორის ურთიერთობის გაუმჯობესებასა და სავაჭრო პარტნიორობას შეეხება.

"ბოლო ექვსი წლის განმავლობაში ჩვენ თითქმის 30-ჯერ შევხვდით. რუსეთი ის ქვეყანაა, რომელსაც ყველაზე ხშირად ვსტუმრობ, ხოლო პრეზიდენტი ვლადიმერ პუტინი — ყველაზე ახლო მეგობარი და კარგი კოლეგა. ამაში მაქსიმალურადაა ასახული ორმხრივი ურთიერთობების მაღალი დონე და ჩინეთსა და რუსეთს შორის მჭიდრო სტრატეგიული თანამშრომლობა", — განაცხადა ჩინეთის ლიდერმა პრესკონფერენციაზე.

თავის მხრივ ვლადიმერ პუტინმაც აღნიშნა, რომ მათ საკმაოდ მჭიდრო ურთიერთობა აქვთ და ყურადღებას აქცევენ რუსეთ-ჩინეთის ურთიერთობებს. გარდა ამისა, ჩინეთმა რუსეთის ზოოპარკს ორი პანდა აჩუქა, რისთვისაც პუტინმა მადლობა გადაუხადა:

"ვიცით, რომ ჩინეთში მსგავსი პრაქტიკა, ფაქტობრივად, არ არსებობს. ეს რუსეთისადმი განსაკუთრებული პატივისცემისა და ნდობის ნიშანია. როდესაც პანდებზე ვსაუბრობთ, სახეზე ღიმილი გვიჩნდება. ამიტომ დიდი პატივისცემითა და მადლიერებით ვიღებთ ამ საჩუქარს".

ფოტო: რუსეთის პრეზიდენტის ადმინისტრაცია

სახელმწიფო ვიზიტის ფარგლებში თანამშრომლობის დოკუმენტების პაკეტს მოეწერა ხელი. გარდა ამისა, სი ძინპინი და ვლადიმერ პუტინი დაესწრნენ ღონისძიებას, რომელიც დიპლომატიური ურთიერთობების დამყარების 70 წლისთავს ეძღვნებოდა. 6-7 ივნისს კი ჩინეთის ლიდერი საპატიო სტუმრის სტატუსით პეტერბურგში საერთაშორისო ეკონომიკურ ფორუმს დაესწრება.