მალე ეროვნული ბიბლიოთეკის პირველ კორპუსში, სადაც ამჟამად სარემონტო-სარეაბილიტაციო სამუშაოები მიმდინარეობს, წიგნის დამუშავების ცენტრი გაიხსნება. ცენტრის გახსნის შემდეგ ეროვნულ ბიბლიოთეკაში შემოსული წიგნის საცავამდე გზა მნიშვნელოვნად დამოკლდება.

ეროვნულ ბიბლიოთეკაში შემოსული წიგნი საცავამდე საკმაოდ გრძელ და რთულ გზას გადის. განყოფილებები, რომლებიც წიგნს ამუშავებენ, ბიბლიოთეკის შენობის სხვადასხვა სართულზე, ზოგ შემთხვევაში კი სხვადასხვა კორპუსშია განთავსებული. ამდენად, საჭიროა წიგნების ხშირი გადაზიდვა, რაც წიგნის საცავამდე და შემდეგ მკითხველამდე მისვლის დროსაც ახანგრძლივებს.

წიგნის დამუშავების ცენტრში ის განყოფილებები (ISBN - წიგნის, ISMN- მუსიკალური გამოცემების, ISSN - სერიული გამოცემების საერთაშორისო სტანდარტული ნომრების მინიჭების, დაკომპლექტების, კლასიფიკაციისა და კატალოგიზაციის, ფონდებისა და კატალოგების ორგანიზებისა და დაცვის განყოფილებები), სადაც წიგნის დამუშავება ხდება, ერთ სივრცეში განთავსდება, რითაც დამუშავების პროცესი უფრო სწრაფი გახდება.

"წიგნის დამუშავების ცენტრის მოწყობა გარდა იმისა, რომ დააჩქარებს წიგნის დამუშავებას, დაიცავს წიგნებს დაზიანებისგან, რადგან არ იქნება საჭირო მათი ხშირი გადაზიდვა. წიგნები მკითხველამდე მივა ოპერატიულად და რაც მთავარია, თანამშრომლებს შეუმსუბუქდებათ შრომა", — განაცხადა საბიბლიოთეკო რესურსების დეპარტამენტის დირექტორმა ლევან თაქთაქიშვილმა.

"თავის დროზე, როცა პირველი კორპუსი შენდებოდა, მაშინდელმა არქიტექტორებმა იშხნის მონასტრის სტილის გამოყენება გადაწყვიტეს მოხატულობის მიმართულებით. ახლა, როცა ამ მონასტრის იატაკის დიზაინიც აღმოჩენილია, ჩვენ სწორედ ამ ფორმით გადავწყვიტეთ იმ სივრცის იატაკის მოხატვა, სადაც მალე წიგნის დამუშავების ცენტრი დაიდებს ბინას", — აცხადებს ეროვნული ბიბლიოთეკის დირექტორი გიორგი კეკელიძე.