"მთავარი ჩემი შეფასება არის, რომ ტურისტული ქალაქი არის მოწესრიგებული", — ასე პასუხობს ქობულეთის საკრებულოს ქართული ოცნების დეპუტატი გიორგი გოგიტიძე კითხვას, სანდასუფთავებაში, სავარაუდოდ, ფიქტიურად დასაქმებულებზე. გუშინ, 5 ივნისს TV 25-მა გაავრცელა ინფორმაცია, რომ ქობულეთის ააიპ სანდასუფთავებაში 15-მდე ადამიანი, მათ შორის დირექტორის ნათესავები, ფიქტიურად არიან დასაქმებული.

ჟურნალისტის დამაზუსტებელ კითხვაზე, არის თუ არა დეპუტატისთვის მნიშვნელოვანი, რომ ბიუჯეტიდან ხელფასს იღებს ადამიანი, რომელიც სამსახურში არ დადის, ის პასუხობს: "ადმინისტრაცია შესაბამისი კომპეტენციის ფარგლებში აწარმოებს საქმიანობას, თუ ფაქტი იქნება არსებული დასტურში მოყვანილი, შესაბამისი ზომების იქნება გატარებული".

შესაბამის რეაგირებაზე საუბრობს ქობულეთის მერი მირიან ქათამაძეც. მისი თქმით, თუ დარღვევა დაფიქსირდება დასაქმებულს ხელშეკრულება შუეწყდება. თუმცა, ამბობს, რომ მათი ინფორმაციით მსგავსი შემთხვევა არ დასტურდება.

"რა თქმა უნდა, ძალიან მნიშვნელოვანია თქვენს მიერ მოწოდებული ინფორმაცია და კიდევ ერთხელ ვადასტურებ, თუ ასეთი რამ სამართლებრივად დადასტურდება, შესაბამისი შრომითი ხელშეკრულება მოიშლება", — განუცხადა მან TV 25-ს.

ეს საკითხი შეაფასა საკრებულოს თავმჯდომარის მოადგილე ნათია თხილაიშვილმაც. მისი თქმით, ფიქტიურად დასაქმება დანაშაულია, თუმცა, მისივე თქმით, ვერ იჯერებს, რომ ასეთ რამ მართლა მოხდა.

"ჩემთვის ეს არის საუცხოო სურპრიზის ინფორმაცია, რომ დასუფთავების სამსახურს ყავს ფიქტიური თანამშრომლები. რა თქმა უნდა, დანაშაულია ნებისმიერ სამსახურში. ადამიანი თუ არ მუშაობს და ფიქტიურია ეს ჩვეულებრივი დანაშაულია, მაგრამ მე არ მგონია, რომ ესეთი რამე არსებობდეს", — განაცხადა მან.

ქობულეთის სანდასუფთავების დირექტორი არ ადასტურებს, რომ ფიქტიურად დასაქმებული თანამშრომლები ყავს, თუმცა არ უარყოფს იმას, რომ თავისი ნათესავები დაასაქმა. მისი თქმით, ძმისა და სიძის დასაქმებაში ნეპოტიზმს ვერ ხედავს, რადგან მათ გამო არავინ გაუგდია და თავისუფალი ადგილები შეავსო.

"ვინმეს ხარჯზე დავასაქმე? არა შენ ცოლის ძმას ხომ არ დავნიშნავდი, აბა, ვერ გავიგე მე ახლა. დავნიშნე დიახ. მოვედი აქა, შევხედე ადგილები ცარიელი იყო, მოვიყვანე ჩემი ცოლის ძმა და დავნიშნე, რაა ამაში ცუდს", — აცხადებს ის.