პარტიამ დემოკრატიული მოძრაობა – ერთიანი საქართველო სახელწოდება შეიცვალა და ერთიანი საქართველო – დემოკრატიული მოძრაობად გარდაიქმნა. გადაწყვეტილება გუშინ, 2 ივნისს პარტიის ყრილობაზე მიიღეს. სახელწოდების ცვლილების გარდა პარტიაში რებრენდინგიც განხორციელდა, შეიცვალა ლოგო და სიმბოლიკა.

ფეისბუქზე ნინო ბურჯანაძემ ლოგოს შესახებ განმარტებითი ვიდეო ჩაწერა და ის სიმბოლიკები განმარტა, რითაც პარტიის ახალი ვიზუალია დატვირთული.

უფრო კონკრეტულად, ერთიანი საქართველო-დემოკრატიული მოძრაობის ახალი ლოგოა მუხა 33 ვარსკვლავით. ბურჯანაძის განმარტებით, ეს მთლიანობას, პროგრესისადმი სწრაფვას და აღორძინებას გამოხატავს.

ნინო ბურჯანაძე ლოგოსა და სიმბოლიკაზე

  • მუხა — სიძლიერის, ერთიანობის, სიმტკიცის და გამძლეობის, ქართველისთვის ის შეუდრეკელობის და უკვდავების სიმბოლოა.
  • ვარსკვლავი — მარადიულობის, მაღალი მისწრაფებებისა და იდეალების სიმბოლოა.
  • კაშკაშა ცისკრის ვარსკვლავი იესო ქრისტეს სიმბოლოა, რვაქიმიანი ვარსკვლავი — სულიერი აღორძინების. შობის ვარსკვლავი გაბრწყინების სიმბოლოა.
  • 33 ქართული ანბანის ასოების რაოდენობა, ქრისტეს ასაკია.
  • ნარინჯისფერი — ოპტიმისტური, თავისუფლების ფერი, შეუდრეკელობის სულიერი გაბრწყინების და გამრავლების სიმბოლოა.
  • ლურჯი — სამართლიანობასა და ერთიანობას, სტაბილურობის, სიმშვიდის წესიერებისა და ღრმა ანალიზისა და ფიქრის სიმბოლოა.
  • თეთრი — სიკეთის, სრულქმნილების, სიმტკიცის, წესიერებისა და ერთგულების სიმბოლოა.
  • პოლიტიკაში თეთრი ფერი ნიშნავს სოციალურ სამართლიანობასა და ერთიანობას, ტრადიციულობას, განვითარებას, წარმატებას, საქმის ცოდნასა და კონფლიქტების თავიდან არიდებას.

რიგგარეშე ყრილობაზე ერთიანი საქართველო – დემოკრატიული მოძრაობის თავმჯდომარედ კიდევ ერთხელ აირჩიეს ნინო ბურჯანაძე. გენერალური მდივნის პოსტი კი გიგლა ბარამიძემ დაიკავა. ნინო ბურჯანაძის განმარტებით, მათი მთავარი ამოცანა 2020 წლის საპარლამენტო არჩევნებისთვის მზადებაა.