ნანა კოსტავა აცხადებს, რომ ქუთაისის საკრებულოს ორშაბათს, 3 ივნისს დატოვებს. ამის შესახებ მან იმედს განუცხადა.

"ფრაქციის თავმჯდომარეობა დავტოვე, ფრაქციიდან გამიშვეს, ყველა გაემიჯნა ჩემს [პოსტს] და საკრებულოსაც აუცილებლად დავტოვებ. მე არ ვარ სკამზე მიჯაჭვული პიროვნება. არც ხელფასი, არც სკამი, არც არანაირი პოპულარობა არ მიღირს არაფრად", — ამბობს კოსტავა და აზუსტებს, რომ ეს მისი საბოლოო გადაწყვეტილებაა.

მანამდე კოსტავამ On.ge-ს უთხრა, რომ საკრებულოს დატოვებას "ჯერ ფიქრობს". ის დღეს, 31 მაისს ქართულმა ოცნებამ ფრაქციის თავმჯდომარეობიდან მოხსნა. თუმცა, ის დეპუტატის მანდატს მაინც ინარჩუნებს. ის ქუთაისის გენდერული თანასწორობის საბჭოდანაც გარიცხეს.

ქუთაისის საკრებულოს დეპუტატმა, ნანა კოსტავამ Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

ამავე თემაზე: