მუნიციპალური ტრანსპორტით უბილეთო მგზავრობაზე 5-ლარიანი ჯარიმის ოც ლარამდე გაზრდას პარლამენტმა მესამე მოსმენით მხარი დაუჭირა. ადმინისტრაციულ სამართალდარღვევათა კოდექსში ცვლილებას მხარი 88 დეპუტატმა დაუჭირა, წინააღმდეგი ხუთი იყო.

კანონპროექტის მიხედვით, საურავის ოდენობა 50-დან 40 ლარამდე მცირდება. გარდა ამისა, მგზავრი ვალდებულია მგზავრობის დასაწყისიდანვე შეიძინოს ბილეთი ან ელექტრონული გადახდის საშუალებით გადაიხადოს თანხა.

"დედაქალაქში ევროსტანდარტების შესატყვისი ადგილობრივი საქალაქო რეგულარული სამგზავრო გადაყვანის M3-კატეგორიის ახალი ავტობუსების შემოყვანის პროცესის დაწყებას მოჰყვა ახალი სისტემის დანერგვა — მგზავრობის საფასურის ელექტრონული გადახდის საშუალებით გადახდა თანდათანობით გამოიღებს იმ შედეგეს, რომ აღმოიფხვრება გაჩერების სამგზავრო ბილეთებით დანაგვიანების პრაქტიკა და შეამცირებს ბილეთის ქაღალდზე გასაწევ ხარჯს", — წერია კანონპროექტის განმარტებით ბარათში.