უკრაინის ახლადარჩეულმა პრეზიდენტმა, ვოლოდიმირ ზელენსკიმ ოდესის ყოფილ გუბერნატორსა და საქართველოს ყოფილ პრეზიდენტს, მიხეილ სააკაშვილს უკრაინის მოქალაქეობა დაუბრუნა. ამის შესახებ უკრაინის პრეზიდენტის საიტზე გავრცელდა ინფორმაცია.

22 მაისს მიხეილ სააკაშვილმა წერილით მიმართა ვოლოდიმირ ზელენსკის, დაებრუნებინათ მისთვის უკრაინის მოქალაქეობა. წერილში მოქალაქეობის ჩამორთმევის გადაწყვეტილებას სააკაშვილი "უკანონოს" უწოდებდა, ვინაიდან, მისი თქმით, უკრაინის კონსტიტუცია კრძალავს არსებული მეთოდით მოქალაქეობის ჩამორთმევას. სააკაშვილის განცხადებით, საერთაშორისო სამარაშორისო სამართლით არ შეიძლება ადამიანის მოქალაქეობის გარეშე დატოვება.

მიხეილ სააკაშვილი უკრაინის პრეზიდენტის გადაწყვეტილებას ფეისბუკის საკუთარ გვერდზე გამოეხმაურა:

"მადლობა პრეზიდენტ ზელენსკის, დიდება უკრაინას", — წერს სააკაშვილი.

უკრაინის საპრეზიდენტო არჩევნების პირველი ტურის დროს ვოლოდიმირ ზელენსკიმ საქართველოს საზოგადოებრივი მაუწყებლის ჟურნალისტის კითხვის პასუხად თქვა, რომ მიხეილ სააკაშვილი სერიოზული დიპლომატია, ხოლო თუკი მას უკრიანის მოქალაქეობა ჩამორთმეული აქვს, ის უნდა დაუბრუნდეს.

მიხეილ სააკაშვილის საქმე უკრაინაში

უკრაინის სამართალდამცავი ორგანოები მიხეილ სააკაშვილს ბიზნესმენ სერგეი კურჩენკოსგან, ნახევარი მილიონი დოლარის მიღებას ედავებოდნენ. გამოძიებას მიაჩნდა, რომ ეს თანხა სააკაშვილმა საპროტესტო აქციების დასაგეგმად გამოიყენა.

2018 წლის 12 თებერვალს სააკაშვილი უკრაინაში, რესტორანში დააკავეს. უკრაინის საზღვრის სამსახურმა გაავრცელა ინფორმაცია იმის შესახებ, რომ მას რეადმისიის პრინციპით დააბრუნებდნენ პოლონეთში, იმ ქვეყანაში, რომლიდანაც შევიდა უკრაინაში.

სააკაშვილის თქმით, ის უკრაინის სამართალდამცავმა ორგანოებმა ძალის გამოყენებით ჩასვეს თვითმფრინავში და ისე გააფრინეს პოლონეთში. მოგვიანებით სააკაშვილი პოლონეთიდან ნიდერლანდებში გადავიდა, სადაც მოქალაქეობა და ევროკავშირის ქვეყნებში ცხოვრების და მუშაობის უფლება მიიღო.

უკრაინაში შესვლა სააკაშვილს 2021 წლის 13 თებერვლამდე ჰქონდა აკრძალული.