მართალია, მსოფლიოში უამრავი საინტერესო ნამუშევარი არსებობს, რომელსაც საინტერესო დეტალები და ისტორია გააჩნია, თუმცა, ნამდვილად ვერ ვიტყვით, რომ ისინი რაიმე გამანადგურებელი საფრთხის მატარებლები არიან.

საქმე ის არის, რომ ინტერნეტში მოღვაწე ხელოვანმა Guo O Dong-მა საკმაოდ უჩვეულო, მაგრამ საინტერესო რამ შექმნა — ერთი შეხედვით ჩვეულებრივი ლეპტოპი, რომელშიც მსოფლიოს მასშტაბით 6 ყველაზე საშიში ვირუსია ჩატვირთული.

ნუ შეგეშინდებათ, რადგან ლეპტოპი არანაირ საფრთხეს არ წარმოადგენს იქამდე, სანამ ინტერნეტს, ან რომელიმე სხვა მოწყობილობას არ დაუკავშირდება.

ხელოვანის თქმით, ასეთი საშიში რამის შექმნის მიზანი ის იყო, რომ ადამიანებისთვის ინტერნეტ სივრცეში არსებული პოტენციური საფრთხეები დაენახვებინა, რომელთა უმრავლესობაც ხშირად აბსტრაქტულადაც კი გვეჩვენება.

"ჩვენ ხშირად ვფიქრობთ, რომ ინტერნეტში მრავლად არსებული საფრთხეები, რომლებსაც ეს საშიში ვირუსები ქმნიან, ზიანს ვერ მოგვაყენებენ, თუმცა, ასე არ არის. სინამდვილეში, მათ საკმარისი ძალა აქვთ, რომ ენერგოსისტემები და საჯარო ინფრასტრუქტურა დააზიანონ", — ამბობს ხელოვანი.

ლეპტოპში ჩატვირთულია ისეთი საშიში ვირუსი, როგორიც არის ე.წ "ILOVEYOU" - რომელიც მსხვერპლს სასიყვარულო წერილის სახით მისდიოდა. ასევე "WannaCry", რომელმაც 2017 წელს, მსოფლიოს სხვადასხვა კუთხეში საავადმყოფოებსა და ქარხნებს შეუტია და სავარაუდოდ, ჩრდილოეთ კორეიდან ვრცელდებოდა — ხელოვანი ფიქრობს, რომ ეს შესანიშნავი მაგალითია იმისა, თუ რამხელა ზიანის მოტანა შეუძლია კომპიუტერულ ვირუსს.

აღსანიშნავია, რომ მსოფლიოში ყველაზე საშიში ვირუსების მატარებელი ლეპტოპი ინტერნეტ აუქციონზე იყიდებოდა და მისი საწყისი ფასი დაახლოებით ერთი მილიონი დოლარი იყო. საბოლოო ჯამში კი ის მილიონ სამასი ათას დოლარად გაიყიდა.