იუსტიციის საბჭოს მდივანმა გიორგი მიქაუტაძემ მოსამართლეთა ასარჩევ კონკურში სააპელაციო სასამართლოს ადმინისტრაციულ საქმეთა პალატაში წარდგენილი კანდიდატურა მოხსნა. შესაბამისად, მის კანდიდატურას იუსტიციის საბჭო მხოლოდ საქალაქო სასამართლოს ადმინისტრაციულ პალატაში უვადოდ დასანიშნად განიხილავს. მიქაუტაძე ამ დრომდე საქალაქო სასამართლოში იყო ვადიან მოსამართლეთ დანიშნული.

"მე უარს ვამბობ სააპელაციო სასამართლოში შეტანილ განაცხადზე და ამ კუთხით დაწინაურებაზე და საბჭოს ვთხოვ განიხილოს ჩემი კანდიდატურა იქ, სადაც ამჟამად ვარ გამწესებული, თბილისის საქალაქო სასამართლოს ადმინისტრაციულ საქმეთა კოლეგიაში. ჩემი ვადა ბევრი არ არის დარჩენილი, დაახლოებით ორი წელი. მე მაქვს ამის სურვილი და უფლებაც, უვადოდ გადანიშვნაზე მქონდეს პრეტენზია და სწორედ ამიტომ ვტოვებ ჩემს კანდიდატურას პირველ ინსტანციაში განსახილველად", — განაცხადა გიორგი მიქაუტაძემ.

მისი თქმით, უზენაესში კანდიდატურის დაყენებას არ გამორიცხავს, თუმცა ამ ეტაპზე განაცხადი შეტანილი არ აქვს.

საქართველოს იუსტიციის საბჭოს დღევანდელ სხდომაზე მოსამართლეობის კანდიდატების შესარჩევი კონკურსის კენჭისყრა გაიმართება. საბჭოს 43 ვაკანტური თანამდებობა 78 კანდიდატისგან უნდა დააკომპლექტოს.

კანდიდატებს შორის არის იუსტიციის საბჭოს 4 წევრიც, ვასილ მშვენიერაძე, რევაზ ნადარაია, ირაკლი ბონდარენკო და გიორგი მიქაუტაძე. მიქაუტაძე ამ დროისთვის იუსტიციის საბჭოს მდივნის მოვალეობას ასრულებს.

საბჭომ კონკურსი რამდენიმე თვის წინ გამოაცხადა, გასაუბრება ყველა კანდიდატთან, დაახლოებით 6 თვის შემდეგ დასრულდა. სწორედ ეს გახდა, საბჭოს არამოსამართლე წევრების ბრალდებების საფუძველი. ისინი, საბჭოს მოსამართლე წევრებს, კონკურსის მიზანმიმართულ გახანგრძლივებაში ადანაშაულებენ და პროცესს უზენაეს სასამართლოში მოსამართლეთა შერჩევის პროცესს უკავშირებენ.