შვილის მკვლელობაში ბრალდებულ არასრულწლოვან დედასთან სექსუალურ კავშირზე შინაგან საქმეთა სამინისტრომ გამოძიება დაიწყო. როგორც უწყებაში On.ge-ს განუცხადეს, დაკავებული გოგო ორსულობისას 16 წლის არ იყო. საქართველოს სისხლის სამართლის კოდექსის 140-ე მუხლით კი 16 წლამდე მიუღწეველთან სექსუალური კავშირი დანაშაულია.

შსს-ში ამბობენ, რომ დანიშნულია შესაბამისი ექსპერტიზა, დასკვნის მიღების შემდეგ კი პოლიცია ბავშვის მამის პასუხისმგებლობაზე იმსჯელებს.

22 მაისს კასპის რაიონის სოფელ აღაიანში ჩვილის მკვლელობის საქმეზე შინაგან საქმეთა სამინისტრომ 16 წლის დედა დააკავა. უწყებაში ამბობენ, რომ დედა დანაშაულს აღიარებს. გოგოს აღკვეთის ღონისძიების სახით პატიმრობა შეეფარდა.

ამავე საქმეზე შინაგან საქმეთა სამინისტროს გენერალურმა ინსპექციამ მოკვლევა დაიწყო და ერთი თანამშრომელი დაითხოვა. უწყების ინფორმაციით, 2017 წლის სექტემბერში შევიდა მათთან შეტყობინება არასრულწლოვნის სახლიდან წასვლის შესახებ. მათივე მტკიცებით, პოლიციამ გამოკითხა მოზარდი, თუმცა არასრულწლოვანმა არ დაადასტურა მის მიმართ რაიმე დანაშაულის ჩადენის ფაქტი. სერვისების განვითარების სააგენტომ 2018 წლის ოქტომბერში აცნობა შსს-ს ბავშვის დაბადების რეგისტრაციის შესახებ, თუმცა გამოძიება არც მაშინ დაწყებულა.