მთავრობის განკარგულებით, ქუთაისის საუნივერსიტეტო კომპლექსის სამშენებლო სამუშაოებისთვის ა(ა)იპ ასოციაცია ატუს უფლებას აძლევს, რომ წითელ ნუსხაში შეტანილი ხეები მოიჭრას. აღნიშნული განკარგულება მთავრობამ 17 მაისს გამოსცა.

როგორც დოკუმენტში წერია, ბუნებრივი გარემოდან უნდა ამოიღონ შემდეგი მცენარეები:

  • იმერული მუხა — 60 ცალი;
  • ძელქვა — 45 ცალი.

განკარგულებაში ნათქვამია, რომ ასოციაცია ატუმ მოჭრილი ხეები დაუკოტრავი სახით ეროვნული სატყეო სააგენტოს მითითებულ ტერიტორიაზე უნდა დაასაწყობოს.

2016 წელს პროექტის პრეზენტაციისას, მაშინდელმა პრემიერმა, გიორგი კვირიკაშვილმა განაცხადა, რომ ქუთაისის საუნივერსიტეტო ქალაქი 140 ჰა-ზე აშენდება და 60 ათას სტუდენტეზე იქნება გათვლილი. მისივე თქმით, შენობების საერთო ფართი მილიონი მ2 იქნება, სადაც განთავსდება საგანმანათლებლო და სამეცნიერო სივრცეები, აუდიტორიები, ულტრათანამედროვე ტექნიკით აღჭურვილი ლაბორატორიები, საკონფერენციო დარბაზები, ბიბლიოთეკები, საერთო საცხოვრებლები სტუდენტებისთვის და პროფესორ მასწავლებლებისთვის.