საქართველოს პარლამენტის თავმჯდომარე, ირაკლი კობახიძე აცხადებს, რომ "სულ მცირე ყოველი მეორე ამომრჩეველი მხარს უჭერს ქართულ ოცნებას. ეს განცხადება კობახიძემ გადაცემაში პირისპირ NDI-ის კვლევაზე კითხვის საპასუხოდ გააკეთა.

მისი თქმით, ეს არ ნიშნავს, რომ ეს ამომრჩეველი არის სრულად კმაყოფილი იმ პოლიტიკით, რომელსაც ქართული ოცნება ახორციელებს.

"სასურველია ხელისუფლებისთვის ოპოზიციის გაძლიერება, თუმცა, სამწუხაროდ, ამის ნიშნები ჯერ არ იკვეთება. მომავალ წლამდე ამის მოლოდინი დღეს არ შეიძლება გვქონდეს", — განაცხადა კობახიძემ.

NDI-ს კვლევის მიხედით, ხვალ რომ არჩევნები ტარდებოდეს გამოკითხულთა 17 პროცენტი ხმას ქართულ ოცნებას მისცემს, ხოლო ნაციონალურ მოძრაობას — 14 პროცენტი. ამავე კვლევის თანახმად, რესპონდენტების 27-მა პროცენტმა არ იცის ხმას ვის მისცემდა, ხოლო 16 პროცენტი ამბობს, რომ არც ერთ პარტიას არ დაუჭერდა მხარს. ამავე კვლევის მიხედვით, ხვალ რომ არჩევნები ტარდებოდეს გამოკითხულთა 60 პროცენტს გადაწყვეტილი არ აქვს რომელ პარტიას ან გაერთიანებას დაუჭერს მხარს.