ქართული ოცნების გენერალურმა მდივანმა კახა კალაძემ ხუთ საათზე პარტიის ოფისში პრესკონფერენცია ჩაატარა. თბილისის მერი საქართველოს მესამე პრეზიდენტის განცხადებას გამოეხმაურა და აღნიშნა, რომ ვერავინ ვერ გაბედავს, ქვეყანაში შემოიტანოს ასეთი ქაოსი.

"ჩემთვის მიუღებელია ქვეყანაში არეულობა და დაპირისპირება. ჩვენ გახსოვს რა მოუტანა ჩვენს ქვეყანას დაპირისპირებამ, სისხლის ღვრამ, სამოქალაქო ომებმა. ეს ყველაფერი წარსულს ჩავაბარეთ და ვერავინ ვერ გაბედავს იმას, რომ ქვეყანაში შემოიტანოს ასეთი ქაოსი", - თქვა კალაძემ.

მმართველი პარტიის გენერალურმა მდივანმა აღნიშნა, რომ ხელისუფლებას ყველა კანონდარღვევაზე შესაბამისი რეაგირება ექნება, განურჩევლად იმისა, თუ ვინ ჩაიდენს მას.

"თუ ვინმე კანონს გადასცდება, არ აქვს მნიშვნელობა ეს იქნება ყოფილი პრეზიდენტი, მისი თანაგუნდელები - მთავრობა, რა თქმა უნდა, იმოქმედებს და ექნება რეაგირება ყველაფერზე კანონის შესაბამისად", - ამბობს კახა კალაძე.

თბილისის მერმა, ვიცე-პრემიერმა და პარტიის გენერალურმა მდივანმა, საარჩევნო გარემოც შეაფასა და აღნიშნა, რომ ხმის მიცემის პროცესი თავისუფალ, დემოკრატიულ და სამართლიან გარემოში მიმდინარეობს.

"ხმის მიცემის პროცესი დემოკრატიულად და სამართლიანად მიმდინარეობს. მინდა მოვუწოდო მხარდამჭრებს ყველა საარჩევნო ოლქში მოვბილიზდეთ და ჩვენი არჩევანი დავაფიქსიროთ. შესაძლო პროვოკაციების მიუხედავად მშვიდად მივიყვანოთ გამარჯვებამდე", - თქვა კალაძემ.

მან მადლობა გადაუხადა და მეტი აქტიურობისკენ მოუწოდა პარტიულ აქტივსაც.

"აქვე მინდა მივმართო ჩვენს აქტივს, მინდა მადლობა გადავუხადო მათ გაწეული შრომისთვის. მათი საქმე ფასდაუდებელია, დაწყებული საქმე ბოლომდე გვაქვს მისაყვანი", - აღნიშნა თბილისის მერმა.

კახა კალაძე ფოტოსურათებიანი სიების აღმოჩენის შემთხვევასაც შეეხო და თქვა, რომ ამ სიებზე წვდომა ყველა პარტიას აქვს და ამაში უკანონო არაფერია. მან პატიულ აქტივს მოუწოდა, რომ ღიად და თავისუფლად განაგრძონ მუშაობა.

"რაც შეეხება ფოტოსურათებიან სიებს, რომელსაც ცესკო ყველა პოლიტიკურ პარტიას ურიგებს, ის პირად ნომრებს არ შეიცავს და მისი გამოყენება კანონიერია. მინდა მოვუწოდო ჩვენს აქტივს, არავინ შეგიყვანოთ შეცდომაში. იმუშავეთ ღიად და თავისუფლად. თუ ვინმე შეეცდება ხელის შეშლას, მიმართეთ შესაბამის სამსახურებს" - თქვა კალაძემ.

ქართული ოცნების გენერალური მდივანი საიას განცხადებასაც გამოეხმაურა, რომლის მიხედვითაც არასამთავრობო ორგანიზაცია შემაშფოთებლად აფასებდა კახა კალაძის მიერ დღეს დილას გაკეთებულ განცხადებას კოორდინატორებთან დაკავშირებით.

"ჩემთვის გაუგებარია საიას განცხადება. შემაშფოთებელი უწოდა და ასევე, თვითონვე საუბრობენ რომ ეს კანონის დარღვევა არ არის, ამიტომ ჩემთვის გაუგებარია მათი განცხადებები. შეიძლება სააკაშვილის განცხადებაში აერიათ და ალბათ მაგიტომ უნდოდათ ეთქვათ შემაშფოთებელი", - თქვა კალაძემ.