"ბეჭდების მბრძანებელივით მოიპარეს რაღაცა ბეჭდები", — ამ სიტყვებით ევროპული საქართველოს წევრი, გიგი უგულავა ზუგდიდის ინციდენტს გამოეხმაურა. ოპოზიციის თქმით, ზუგდიდის N67 საოლქო საარჩევნო კომისიამ საარჩევნო უბნებზე სამაგიდო სიები, საარჩევნო ბეჭდები და ლუქები არჩევნებამდე ხუთი დღით ადრე დაარიგა.

"ათას სიგიჟემდე მიდიან. სიებს აყალბებენ, ათას მანიპულაციებს ჩადიან, არნახულს, ჯერ არ გაგონილს, ჯერ არგამოგონებულს", — განაცხადა უგულავამ გადაცემა არჩევანში და აღნიშნა, რომ ზუგდიდის მერობის არჩევნებში გაერთიანებული ოპოზიციის კანდიდატს, სანდრა რულოვსს უჭერს მხარს.

ზუგდიდში სამაგიდო სიებისა და ბეჭდების დაგზავნის შემდეგ ოპოზიცია ოლქის შენობასთან აქციას მართავს. ისინი საოლქო საარჩევნო კომისიის თავმჯდომარის გადაყენებასა და ახალი ბეჭდების გაგზავნას ითხოვენ. ზუგდიდში მერის რიგგარეშე არჩევნები 19 მაისს ჩატარდება.