მეორე მსოფლიო ომში ფაშიზმზე გამარჯვებიდან 74-ე წლისთავის აღნიშვნის პარალელურად ვაკის პარკის მიმდებარე ტერიტორიაზე სამი საპროტესტო აქცია მიმდინარეობს. თბილისში, ილია ჭავჭავაძის გამზირზე რუსეთში დაფუძნებული ორგანიზაცია, უკვდავთა პოლკის ინიციატივით მსვლელობა იმართება. აქციის მონაწილეები პროსაბჭოური ხედვებით გამოირჩევიან და უჭირავთ სტალინის პორტრეტები. ორგანიზაციის საერთაშორისო საინფორმაციო ცენტრის ვებგვერდზე კი ოკუპირებული აფხაზეთი და სამხრეთ ოსეთი დამოუკიდებელ სახელმწიფოებად არის წარმოდგენილი.

ფოტო: თამუნა გეგიძე / On.ge

უკვდავთა პოლკის მსვლელობის პარალელურად მოძრაობა "რუსეთი ოკუპანტიას" მიერ ორგანიზებული აქცია "არა პუტინის მარშს" იმართება. აქციის ორგანიზატორების აზრით, "უკვდავი პოლკი პუტინის პროპაგანდისტული რეჟიმის პროექტია და კრემლის კოლაბორაციონისტულ ძალებს აძლიერებს ყველგან, სადაც ოფიციალურ მოსკოვს საკუთარი ინტერესები აქვს".

ფოტო: ირაკლი კუნჭულია / On.ge

"აქციის მიზანი არ არის უკვდავთა პოლკის მსვლელობის ჩაშლა, არამედ საპირისპირო, პრო-ევროპული და პრო-ამერიკული აზრის მშვიდობიანად გაჟღერება", — წერენ აქციის ორგანიზატორები.

ფოტო: აკა ზარქუა / On.ge

ამავე შინაარსის აქცია-მსვლელობას მართავს ვაკის პარკში ალეკო ელისაშვილი ლოზუნგით, "არა გენოციდს". მისი თქმით, როდესაც სახელმწიფო არ არსებობს, ხალხმა უნდა დაანახოს მათ [ხელისუფლებას], რომ ხალხია სახელმწიფო.

"გამოვედით რაღაც საძაგელი რუსული პოლკის საწინააღმდეგოდ. ჩემთვის პირადად დაუჯერებელია, რომ არსებობენ საქართველოში ქართველები, რომლებიც აი ამ რუსულ თამაშში მონაწილეობენ", - ამბობს ელისაშვილი.

დღეს, 9 მაისს ტრადიციულად ვაკის პარკში, როგორც ომის ვეტერანები, ისე ხელისუფლების, სხვადასხვა პოლიტიკური პარტიის წარმომადგენლები თუ რიგითი მოქალაქეები მიდიან და უცნობი ჯარისკაცის საფლავზე ყვავილები მიაქვთ.