ოსკარის მფლობელი, 40 წლის ფრანგი მსახიობი, მარიონ კოტიარი, რომელსაც ყვითელი პრესა ანჯელინა ჯოლისა და ბრედ პიტის დაშორების მთავარ მიზეზად განიხილავდა, პირველ ოფიციალურ კომენტარს აკეთებს და მის და ბრედ პიტს შორის "არსებულ რომანზე" მითქმა-მოთქმას საკუთარ ინსტაგრამზე ვრცელი წერილით ეხმაურება.

კოტიარი საზოგადოებას ამცნობს, რომ ის და მისი ქმარი, ასევე მსახიობი, გიიომ კანე, მეორე შვილს ელოდებიან.

მარიონ კოტიარის წერილს უცვლელად გთავაზობთ:

ეს იქნება ჩემი პირველი და ერთადერთი რეაქცია იმ გახმაურებულ ახალ ამბავზე, რომელიც 24 საათის წინ გაჟღერდა და მეც მომიყოლა თავის გრიგალში.

მსგავს ამბებს არასდროს ვპასუხობდი, რადგან არ მივიჩნევდი სერიოზულად. მაგრამ, ეს სიტუაცია ჩემს საყვარელ ადამიანებზე უარყოფითად მოქმედებს, ამიტომ, ვალდებული ვარ, ვისაუბრო.

პირველ რიგში, უამრავი წლის წინ, მე შევხვდი კაცს, რომელიც ჩემი ცხოვრების სიყვარული და ჩემი შვილის მამაა, და ასევე იმ ბავშვის, რომელსაც ახლა ველოდებით. ის ჩემი სიყვარულია, ჩემი საუკეთესო მეგობარი და ერთადერთი, ვინც მჭირდება.

მეორე, მათ, ვინც ამბობს რომ მე განადგურებული ვარ, მინდა ვუპასუხო, რომ თავს შესანიშნავად ვგრძნობ, დიდი მადლობა. მსგავსი გამოგონილი ჭორები ჩემთვის სტრესული არაა.

ასევე მივმართავ მედიის წარმომადგენლებს და იმ სიძულვილით სავსე ადამიანებს, რომლებმაც არ დაიშურეს სწრაფი რეაქცია და ჩემი კრიტიკა - სწრაფ გამოჯანმრთელებას გისურვებთ.

საბოლოოდ, კი ანჯელინას და ბრედს, რომლებსაც მე დიდ პატივს ვცემ, ვუსურვებ იპოვონ სიმშვიდე ამ ხმაურიან სიტუაციაში.

სიყვარულით

მარიონი