რუსთავი 2-ის ცხრაპროცენტიანი წილის მფლობელის, ნინო ნიჟარაძის ადვოკატი, გიორგი ყავლაშვილი ამბობს, რომ ისინი მზად არიან სარჩელი არბიტრაჟში განიხილონ, იქნება ეს საქართველოში თუ მის ფარგლებს გარეთ. ადვოკატი გადაცემა რეაქციაში არბიტრაჟთან დაკავშირებით არხის გენერალური დირექტორის, ნიკა გვარამიას შემოთავაზებას გამოეხმაურა.

"დღეს საუბარი კომპანიის პარტნიორებისა და დირექტორების მხრიდან, რომ თუ მას მართლა აინტერესებს რამე წავიდეთ არბიტრაჟში რატომ მიდის სასამართლოში, ძალიან უხერხულია იმის ფონზე, როდესაც ერთ წერილზეც არ აქვთ პასუხი გაცემული. სარჩელის შეტანის წინ კიდევ ერთხელ ვთხოვეთ ინფორმაციაში გარკვევა. არაფერზე არ გვიპასუხეს. ამ უკომუნიკაციობის ფონზე ერთადერთი გზა რომელიც დაგვრჩა იყო სასამართლო", — აღნიშნა გიორგი ყავლაშვილმა.

გარდა ამისა, ადვოკატმა სარჩელზე ისაუბრა და თქვა, რომ მისი კლიენტის სარჩელი ტელეკომპანიის წინააღმდეგ მიმართული არ არის. მისივე განმარტებით, სარჩელით თანხების დაკისრება რუსთავი 2-ის სასრგებლოდ არის მოთხოვნილი.

ნიკა გვარამიამ 6 მაისს საგანგებო ბრიფინგი გამართა, სადაც თქვა, რომ ტელეკომპანიის წილის ცხრა პროცენტის მფლობელი, ნინო ნიჟარაძე სხვა მეწილეებისგან 26 მილიონს ითხოვს. ის ამბობს, რომ სარჩელით ნიჟარაძემ სასამართლოს მიმართა. გვარამია ამ ყველაფერს ტელევიზიაზე შეტევის ახალ ფაზად აფასებს.

გარდა ამისა, სარჩელის მიხედვით, ნინო ნიჟარაძე შპს სამაუწყებლო კომპანია რუსთავი 2-ის მართვის ორგანოს — პარტნიორთა კრების 2015 წლის ოქმის ნაწილობრივ ბათილად ცნობას ითხოვს. სარჩელში ვკითხულობთ, რომ "ამ ოქმის გასაჩივრებით უნდა დადგინდეს პარტნიორების: გიორგი ყარამანიშვილის, ლევან ყარამანიშვილის და შპს საქართველოს მხრიდან უფლების ბოროტად გამოყენება, რასაც შედეგად მოჰყვა მოპასუხე პარტნიორთა არამართლზომიერი უარი ნინო ნიჟარაძის მხრიდან წილის გასხვისებაზე". იურისტი გიორგი მშვენიერაძე კი აცხადებს, რომ პარტნიორთა კრების ოქმს გასაჩივრების ვადა გასული აქვს.