ლეიბორისტული პარტიის მაჟორიტარობის კანდიდატი, მიხეილ ქუმსიშვილი On.ge-სთან საუბარში განმარტავს, რომ პარტიის გამარჯვების შემთხვევაში, სახელმწიფო უნივერსიტეტებში უმაღლესი განათლების (ბაკალავრიატი, მაგისტრატურა, დოქტორანტურა) მიღება უფასო იქნება.

ჩვენს შეკითხვას, რა ნაბიჯებს გადადგამენ ლეიბორისტები თსუ-ში არსებული პრობლემების მოსაგვარებლად, ქუმსიშვილმა უპასუხა, რომ პირველ რიგში, აუცილებელია ნებისმიერ უნივერსიტეტს დეცენტრალიზებული სისტემა ჰქონდეს და სრული ავტონომია მიენიჭოს:

“ეს აუცილებელია იმისთვის, რომ სისტემა განვითარდეს. ოდეერების ინსტიტუტი უნდა გაუქმდეს, რაც მხოლოდ და მხოლოდ პოლიტიკურ ნებასთან არის დაკავშირებული. თუკი სახელისუფლებო ორგანოებიდან აღარ იქნება ეს ინტერესი, ეს სისტემა ბუნებრივია აღარ იარსებებს”.

მან აგვიხსნა, რომ პარტია სტუდენტური თვითმმართველობის გაუქმებას ემხრობა იმისთვის, რომ სტუდენტების პოლიტიზირება არ მოხდეს:

"თვითმმართველობა უნდა იყოს არა როგორც ერთი სისტემა - უნივერსიტეტის თვითმმართველი ორგანო, არამედ იყოს საკლუბო დონეზე. მაგალითად, თავისუფალ უნივერსიტეტს აქვს ასეთი”.

მან ასევე განგვიმარტა, რომ პარტიას რამდენჯერმე ჰქონდა ინიციატივა, აუდიტორია 115-ს დაკავშირებოდა, მაგრამ მათ ეს ვერ შეძლეს:

“ეს პრინციპში სწორიც არის, არ უნდათ ამ საქმის პოლიტიზირება. თუკი მათი მხრიდან დაინტერესება იქნება, ჩვენ ვითანამშრომლებთ”.

ვრცლად პოლიტიკური სუბიექტების საარჩევნო პროგრამების შესახებ ინფორმაცია შეგიძლიათ იხილოთ აქ:

პარტიების დაპირებები და ხედვა განათლების სისტემის შესაცვლელად